Skontra llevó la so música a Iparralde

La banda asturiana de punk-folk Skontra actuó esti sábadu pasáu nel Euskal Herria Zuzenean Festibala (EHZ), ún de los festivales más importantes de música que se celebren nel Estáu francés. Tres inscribise nel concursu qu'abre la posibilidá a la participación a cultures minorizaes nel certame, con decisión popular nun primer momentu y por un xuráu, darréu, los asturianos consiguieron formar parte d'un cartelu nel qu'apaecíen nomes como Ska-P, Mexican Institute of Sound, Zea Mays o Esne Beltza, ente otros, amás de formar parte del discu oficial del festival.

 

Tamién participó nel EHZ el coleutivu Ixuxú Asturies-Euskal Herria elkartea, en concreto nel mercadín de coleutivos, facilitando la merca de discos de grupos asturianos a los miles d'asistentes al festival, asina como de materia de movimientos sociales del país como Darréu, La Semiente, Asturies en Pie, FUSOA o la Xunta pola Defensa de la Llingua Asturiana. Otra manera, esta asociación ta preparando un viaxe dende Asturies p'acudir al Edozer Dugu Posible, actividá festiva en Donostia prevista pal día 9 de xunetu qu'entama Donostiako Piratak na que destaques les actuaciones de Manu Chao, Skakeitan, Tania de Sousa y Selektah Stepi. El preciu taría ente los 20 y 30 euros y sería necesario axuntar a 35 persones pa poder sacar alantre l'autocar. La xente interesao pue atopar información y inscribise nel corréu ixuxuelkartea@gmail.com indicando nome, teléfonu de contactu y conceyu de residencia. El día caberu pa reservar plaza ye'l domingu.