El Sporting va recibir a un rival de Lliga de Campeones na Copa

El sortéu crucia a los de David Gallego col Villarreal llueu de superar al Alcorcón (2-1). El Llanera nun pudo col Mallorca (0-6).

L'equipu entrenáu por Unai Emery, clasificáu pa los octavos de final de la Lliga de Campeones, onde va enfrentase a la Juventus, va ser el rival del Sporting nos dieciseisavos de Copa. Ensin dulda, ún de los conxuntos más fuertes qu'entraben nel bombu contra los clubes de Segunda División.

La eliminatoria va xugase na primer selmana de xineru, en día por concretar, pero que va tar al rodiu del día de Reis. Col formatu actual, a partíu únicu hasta semifinales, el duelu tener llugar n'El Molinón.

Los xixoneses lleguen a esta ronda del tornéu depués de dexar fuera al UC Ceares (0-1) y al Alcorcón (2-1), al que derrotaron el miércoles con sufrimientu na prórroga nun mal partíu. Abrió'l marcador Nacho Méndez nel tramu final de la primer parte, pero l'Alcorcón tornó a dexar n'evidencia a la defensa roxiblanca nel minutu 57 col gol d'Al Badaoui.

La inoperancia ofensiva del Sporting llevó'l partíu a lo prórroga, onde una bona aición téunica de Borja López, con control y pase que dexó solo a Gaspar énte José Aurelio, porteru nacíu en Xixón, provocó la xugada del gol. Djuka cazó'l rechace cola cabeza y dio la victoria a los de Gallego nel minutu 9 de la prórroga.

Regalos en trés saques d'esquina

Nun hai más equipos asturianos vivos na Copa depués de que'l Llanera cayera ayeri col Mallorca, de Primera División. Aguantaron 49 minutos los de Posada, que tuvieron que desplazase otra vuelta a Ganzábal por nun poder emplegar el Pepe Quimarán nesta competición contra equipos de LaLiga, pero un error defensivu nun córner aprovecháu por Sedlar, totalmente llibre de marca, desniveló'l choque pa los baleares.

Cinco minutos depués Mboula anotaba'l segundu con un bon disparu dende la frontal, sentenciando Sedlar, otra vegada de cabeza solu nun corner nel 61. El balón paráu, que precisamente foi ún de los aspeutos que destacó'l téunicu visitante Luis García Plaza del so rival, volvió a ser el talón d''Aquiles de Llanera, col remate ensin oposición de Gayà n'otru saque d'esquina nel 74, completando la goliada Javi Llabres nel 77 y Ángel nel 86.

Na semeya, Miguel Linares, direutor deportivu del Linares, amuesa la papeleta del Sporting.