El Reglamentu de la Xunta Xeneral modifícase pa “esclariar y dar seguridá xurídica a cualquier persona que quiera usar l’asturianu”

|
Votación cambiu Reglamentu Xunta Xeneral usu asturianu

El Plenu de la Xunta Xeneral aprobó la derogación del artículu 11 y la creación del 3bis del Reglamentu de la Cámara cola intención de torgar situaciones como la vivida pola conseyera Berta Piñán por emplegar la llingua asturiana. “Va esclariar y dar seguridá xurídica a cualquier persona que quiera usar l’asturianu”, afirma la FSA.

La propuesta del grupu parllamentariu d’IX, tomada en consideración n’ochobre, llegó al Parllamentu esta mañana modificada tres pasar pola Comisión de Reglamentu. Inicialmente, Asturies pela Izquierda propunxo la redaición “nel marcu de lo dispuesto pol Estatutu d’Autonomía y, nel so casu, pola llexislación que lo desendolque, tanto los diputaos nel exerciciu de les sos funciones parllamentaries como cualquier otra persona que compareza énte la Cámara podrán utilizar el bable/asturianu” nel artículu 11, pero la Federación Socialista Asturiana (FSA-PSOE) entendió más afayadizo un cambiu mayor aceptáu por otres formaciones.

Asina derógase dichu artículu 11 y incorpórase un “artículu nuevu 3 bis”, nel Títulu Preliminar del Reglamentu, con dos puntos. El primeru espresa que “nel marcu de lo afitao pol Estatutu d’Autonomía y, nel so casu, pola llexislación que lu desendolque, tanto los Diputaos nel exerciciu de les sos funciones parllamentaries como los miembros del Conseyu de Gobiernu, los cargos y emplegaos públicos y cualesquier persona que compareza énte la Cámara podrán utilizar el bable/asturianu”.

El segundu, mentes, diz que “la Mesa de la Cámara, oyida la Xunta de Voceros, adoptará, nel so casu, los criterios oportunos a tal efeutu”. La votación de la modificación, que requería de mayoría absoluta (23 sofitos) salió alantre con 27 votos a favor (Asturies pela Izquierda, FSA, Podemos y el diputáu de Foro Adrián Pumares), 13 en contra (PP, VOX y Pedro Leal, espulsáu de Foro) y 5 astenciones (Ciudadanos).

Contador Estadistiques