El Reglamentu nuevu de la Xunta Xeneral incorpora un artículu específicu pal asturianu nel Títulu Preliminar

El testu, qu'entra a valir el vienres llueu de la so espublización nel BOPA, deroga'l del 1997.

El Plenu del 29 de marzu, últimu de la llexislatura, aprobó –colos votos a favor de la FSA, PP, Ciudadanos, Asturies pela Izquierda (IX-IAS) y Adrián Pumares (Foro), el contrariu de VOX, Luis Armando Fernández Bartolomé y Daniel Ripa, y l'astención de los restantes diputaos de Podemos y de Pedro Leal– la modificación del Reglamentu de la Xunta Xeneral nel que los grupos parllamentarios vienen trabayando estos años. El mesmu incopora un artículu específicu pal asturianu nel Títulu Preliminar, el 5, que recueye'l mesmu conteníu que la modificación fecha nel 2020 depués de la situación vivida pola conseyera de Cultura, Política Llingüística y Turismu na comisión pa esponer les llinies polítiques principales del so departamentu llueu de garrar el cargu.

Esi día dellos diputaos negaron-y el so derechu a emplegar la llingua asturiana na so intervención. Hasta esi momentu la norma de la cámara namái recoyía esta posibilidá pa les diputaes y diputaos, polo que se vio obligada como miembru del Gobiernu a usar el castellanu.

El 1 de xunetu del 2020 aprobóse dicha modificación –col apoyu d'Asturies pela Izquierda (IX-IAS), FSA, Podemos y el diputáu de Foro Adrián Pumares, los votos en contra de PP, VOX y Pedro Leal, y l'astención de Ciudadanos– que derogaba l'artículu 11 que dicía que “nel marcu de lo dispuesto pol Estatutu d’Autonomía y, nel so casu, pola llexislación que lo desendolque, tanto los diputaos nel exerciciu de les sos funciones parllamentaries como cualquier otra persona que compareza énte la Cámara podrán utilizar el bable/asturianu”. Incorporábase asina al Títulu Preliminar un 'artículu 3 bis' qu'afitaba nel primer puntu que “nel marcu de lo afitao pol Estatutu d’Autonomía y, nel so casu, pola llexislación que lu desendolque, tanto los Diputaos nel exerciciu de les sos funciones parllamentaries como los miembros del Conseyu de Gobiernu, los cargos y emplegaos públicos y cualesquier persona que compareza énte la Cámara podrán utilizar el bable/asturianu”, y nel segundu que “la Mesa de la Cámara, oyida la Xunta de Voceros, adoptará, nel so casu, los criterios oportunos a tal efeutu”.

Agora entrambos puntos conformen l'artículu 5 del Títulu Preliminar del Reglamentu de la Xunta Xeneral baxo l'epígrafe 'Bable/asturianu'.

Ratificación del Constitucional

L'aprobación de la modificación del Reglamentu de la Xunta Xeneral llegó hasta'l Tribunal Constitucional por un recursu d'anticonstitucionalidá presentáu por VOX. Ésti sentenció nel 2021 a favor del usu del asturianu nel Parllamentu asturianu, fallu consideráu mui importante pal idioma al entrar esti tribunal per primer vegada en materia y reconocer a la llingua asturiana como la propia d'Asturies.

Na semeya, un momentu del Plenu nel que s'aprobó'l Reglamentu.