Marcos a Blanco: “Nun me diga que nun entendió lo que dixo”

|
Interrupción Blanco a Palacios

L’alderique sobre la modificación del Reglamentu de la Xunta Xeneral pal usu del asturianu dexó una interrupción nueva a un diputáu por supuestamente nun entender l’idioma. Otra vegada foi’l de VOX, Ignacio Blanco, nesta ocasión al de Podemos, Rafael Palacios, que llevó al presidente de la Cámara a intervenir: “Nun me diga que nun entendió lo que dixo”, esclamó Marcelino Marcos.

El Plenu d’esta mañana abrióse cola intervención de los voceros, de cuatro minutos de llargor, sobre’l Dicatme de la Comisión de Reglamentu, que deroga l’artículu 11 pa crear ún nuevu, el 3bis. Ésti súmase al Títulu Preliminar de la norma del Parllamentu asturianu.

“Pienso que vamos na direición equivocada”, espresó Blanco, primeru en tomar la pallabra, qu’afirmó que “nun vamos participar nos alderiques que s’espongan esclusivamente en llingua, n'asturianu o n'asturñol porque nun lo entendemos y nun tenemos intención nenguna d’estudialo”. D’igual forma, apuntó que la modificación del Reglamentu “nun va solucionar el problema”.

Adrián Pumares, de Foro, defendió’l cambiu y calificó de “alderique impostáu” la situación dada porque “el verdaderu problema nun ye que nun s’entienda l’asturianu”. “Sí lo entienden, nun ye un tema de comprensión y sí de tolerancia”, añadió.

La vocera del grupu parllamentariu que propunxo la modificación del Reglamentu, IX (Asturies pela Izquierda), recordó que “dende hai 30 años viense emplegando l’asturianu con normalidá na Xunta Xeneral” y que “la llingua asturiana nun tien ideoloxía y ye patrimoniu de toles asturianes y asturianos que llibremente quieran usala”. “El desconocimientu ye un pretestu pa impedir el so usu”, criticó, p’añadir darréu qu’esti cambiu na normativa “vien a correxir esi propósitu”.

La interrupción

L’únicu diputáu que nel alderique emplegó l’asturianu foi’l de Podemos, Rafael Palacios, que nun tardó nin 10 segundu en ser interrumpíu por Blanco alegando nun entender les sos pallabres y que "nun ta aprobada la reforma del Reglamentu entovía". “Nun me diga que nun entendió lo que dixo. Síamos un poco sensatos”, comentó-y el presidente de la Xunta Xeneral, el socialista Marcelino Marcos.

“Hai dalgunes pallabres que nun entiendo”, siguió’l voceru de VOX, que cito en concretu dos: “escueye” y “calter”. Palacios propunxo facer el discursu n’asturianu y llueu repetilo en castellanu, dalgo que Marcos esixó facelo dientro del tiempu de 4 minutos, a lo que protestó’l diputáu de Podemos que finalmente fixo un resume curtiu en castellanu de la so intervención.

“Ye hora de dir resolviendo anomalíes”, aseguró’l de Ciañu, que demandó que “naide nun sía discrimináu por falar na llingua propia”. Tamién pidió “los mesmos derechos que’l restu” de ciudadanos del Estáu y avanzó la so intención d’abrir l’alderique na Xunta Xeneral pa la reforma del Estatutu d’Autonomía pa incluyir la oficialidá.

“Problema qu’hai qu’abordar”

Luis Armando Fernández Bartolomé, de Ciudadanos, calificó, usando l’asturianu, de “aguarón” el dictame de la Comisión de Reglamentu, “porque nun tien nada dientro”. “Tamién hai derechu a usar el romaní o’l yiddish”, dixo, “y nun fadría falta enseñar l’asturianu si tol mundu lu entendiera”, pa depués puntualizar que “nun ye cuestión del derechu al usu, sinón ónde se tien qu’utilizar”.

Asina, apuntó a la esistencia de “un conflictu de derechos qu’esta modificación nun igua” y llamó a abordar “el verdaderu problema”, esto ye, “la situación d’ambigüedá” del asturianu, poniendo los exemplos de la proteición del ladín o de la situación del catalán en Catalunya. Sicasí, pa finar, apuntó que’l “conflictu xurídicu” esistente na Xunta Xeneral “súplese con actitú”.

La evolución del alderique llevó al voceru del PP, Pablo Álvarez-Pire, a arrenunciar al discursu preparáu y a centrase na situación vivida pola intervención n’asturianu de Palacios. “Paramos el Plenu, aconceyamos a la Xunta de Voceros, vemos qué pasa y llueu lo que la Mesa entiende. Y yá perdimos 30 minutos”, espuso al tiempu qu’alertó de la posibilidá “de que se xudicialice too”.

Esta cuestión foi retrucada por María Dolores Carcedo, apuntando que sería previamente la Xunta de Voceros la que determinaría l’usu del asturianu, refugando la posibilidá de que se dean eses situaciones. La vocera socialista calificó de “inédita” la situación provocada “por trés grupos d’esta Cámara”, en referencia a VOX, PP y Ciudadanos, al rodiu d’un cuestión pacífica “que dexa de selo cuando se diz que nun s’entiende”.

Na imaxe, el momentu de la interrupción de Blanco a Palacios y la intervención de Marcos.

Contador Estadistiques