Iniciativa nun entiende la diferente postura de PP y Ciudadanos n'Asturies y Galicia col idioma

"Equí siguen aneciando en postures contraries contra midíes absolutamente de mínimos, como ye la llibertá d'usu del idioma nel Parllamentu asturianu", afirma.

Tres l'aprobación ayeri del cambiu del Reglamentu de la Xunta Xeneral pa permitir l'usu del asturianu na Cámara a cualquier persona que quiera facelo, Iniciativa pol Asturianu quixo felicitar a los grupos que lo sofitaron –Asturies pela Izquierda (Izquierda Xunida-IAS), FSA, Podemos y Foro– "por esti llogru d'importancia pa la presencia pública del idioma na máxima institución de representación de los asturianos y asturianes". D'igual forma critica la posición de PP, que votó en contra al igual que Pedro Leal –espulsáu por Foro–, y Ciudadanos, que s'astuvo, "faen campaña en gallegu al otru llau de la ría del Eo y sofiten la oficialidá y la normalización del gallegu" cuando n'Asturies "siguen aneciando en postures contraries contra midíes absolutamente de mínimos, como ye la llibertá d'usu del idioma nel parllamentu asturianu, qu'ellos mesmos –nel casu del PP– aprobaron cola Llei d'Usu del Asturianu del 1998".

Tamién quier "condergar les pallabres del diputáu de VOX", formación que tamién se posicionó en contra, "que dixo nun querer entender asturianu, lo que demuestra una absoluta falta de respetu a los ciudadanos y ciudadanes que representa, asina como una demostración d'inorancia". "Agora ye'l momentu de poner en funcionamientu esta modificacíon del reglamentu usando l'asturianu en toles ocasiones posibles, pa lo qu'animamos a los diputaos y diputaes a facelo y a formase en casu de que nun tengan esta posibilidá, yá que la meyor política de normalización y dignificación del idioma ye l'usu públicu del mesmu", añade Iniciativa pol Asturianu.

Por esti motivu, la organización úfrese otra vuelta pa poner un cursu d'asturianu a los grupos parllamentarios de la Xunta Xeneral "col envís de que puedan ameyorar el so usu del asturianu y tener les ferramientes pa usar en contestos públicos l'idioma que yá ye pa la mayoría d'ellos parte del so entornu y la so realidá familiar y social diaria".

Na semeya, propaganda eleutoral del popular Alberto Núñez Feijóo, presidente de Galicia, de cara a les eleiciones del 12 de xunetu.