L'asturianu emplegóse con normalidá nel Plenu

|
Nuria Rodríguez intervién n'asturianu na Xunta Xeneral

La diputada de Podemos Nuria Rodríguez entrugó en llingua asturiana a Barbón, dalgo que'l presidente agradeció. VOX amenaza agora con un recursu d'inconstitucionalidá.

"Señora Rodríguez, paezme perbién que falara nesta Cámara, nesta Xunta Xeneral, y creo que ye, dende llueu, nesi sentíu una cuestión prioritaria, importante y de respetu a la nuestra llingua", señaló'l socialista tres sentir la réplica de la ex edil de Xixón Sí Puede dafechu n'asturianu. Enantes, treslladara al llavianés la cuestión "¿cuála ye la valoración que fai'l so Conseyu de Gobiernu del entamu d'esti presente cursu 20-21".

Adrián Barbón contestó que "sobre l'entamu del cursu lo que tengo de dicir ye que ye de relativa normalidá dientro de l'absoluta anormalidá que ye esta pandemia", pa cambiar darréu al castellanu. Na segunda intervención, tres agradecer l'emplegu del idioma a Rodríguez, solicitó-y contestar "para que nadie diga que no me entiende, en castellano".

Esti usu normal del idioma nun-yos prestó a los dos diputaos de VOX, qu'amosaron la so disconformidá a la salida del Plenu. La formación ultraderechista quier torgar l'usu del asturianu de manera espontánea na Cámara obligando a presentar una torna al castellanu de la intervención de forma previa, postura presentada na Xunta de Voceros que llueu flexibilizó aceptando una traducción depués de les intervenciones, dalgo que Podemos nun acepta.

La reforma del Reglamentu de la Xunta Xeneral en xunetu nun solucionó esti asuntu yá que dexa na Mesa de la Cámara la decisión nel casu de que dalgún voceru ponga oxeción al usu del idioma o diga non entendelo. De momento, nun hai alcuerdu ente los grupos parllamentarios énte'l pidimientu de VOX, qu'amenaza agora con presentar un recursu d'inconstitucionalidá.

Na semeya, Rodríguez intervién nel Plenu, colos diputaos de VOX a la so izquierda na parte superior.

Contador Estadistiques