Esti martes, a les 20 hores, ta prevista una concentración n’Uviéu pa conmemorar la decisión de la Organización Mundial de la Salú (OMS) de retirar la homosexualidá de la llista d’enfermedaes mentales. Esti fechu tuvo llugar el 17 de mayu del 1990.
El Caudal va enfrentase al Conquense nel play-off de permanencia en Segunda B, categoría onde permanez l’Uviéu. El Marino va xugase l’ascensu col Costá Calida y los otros cruces son Reus-Uni, Llangréu-La Roda y Tiuya-Las Palmas B.
La editorial Suburbia Ediciones y el Gobiernu d’Asturies tan acabantes d’espublizar la obra ‘La mio voz’, de la xixonesa Marta Mori. Esti llibru de poemes foi ganador l’añu pasáu del Premiu Xuan María Acebal.
Los músicos que quieran participar nel XII Concursu de Gaiteros y Gaiteres Mozos de Bimenes yá pueden unviar la so propuesta a la Casa Conceyu yerbata. Nél pueden participar menores de 21 años a fecha del 30 de xunu.
El sábadu 28 de mayu ta convocada la prueba semestral de conocencia qu’entama l’Academia de la Llingua Asturiana (ALLA). Esti llunes la institución abre'l plazu de matriculación, que va zarrase'l xueves día 26.
‘¡Erre qu’erre! ¡Reduz. Reutiliza. Recicla!’ ye’l nome de la segunda fase de la campaña sobre’l reciclaxe qu’entama’l Serviciu de Normalización Llingüística de Cangas de Narcea. Ésta ta destinada a los comercios del conceyu.
Sambre y Zapica van actuar esta fin de selmana. El grupu de rock va facelo n’Uviéu xunto colos checos Pipes and Pints y los estauxunidenses Born to Lose, mentes que la banda de folk va ambientar el Mercáu Ecolóxicu y Artesanu de Xixón.
Esti domingu va celebrase una manifestación n’Uviéu convocada pola plataforma ‘Democracia real yá Asturies’ pa mostrar el so descontentu cola situación actual. Trátase d’una iniciativa ciudadana alloñada d’intereses políticos y sindicales.
L’Asociación de Fiestes San Martín de Tours entama per cuartu añu’l Certame de la Sidra, qu’axunta a centenares de persones en Sotrondio. Nesta edición ta prevista la participación de 19 llagares que van repartir 2.000 llitros de sidra de baldre.
