Los equipos asturianos yá conocen a los sos rivales p’algamar plaza l’añu próximu en Segunda División B

El Caudal va enfrentase al Conquense nel play-off de permanencia en Segunda B, categoría onde permanez l’Uviéu. El Marino va xugase l’ascensu col Costá Calida y los otros cruces son Reus-Uni, Llangréu-La Roda y Tiuya-Las Palmas B.
 
El sortéu tuvo llugar esti llunes na sede de la Real Federación Española de Fútbol y empareyó al Caudal col Conquense na llucha pola permanencia na categoría, que se celebra a dos partíos. D’esta forma, los mierenses eviten a los equipos de los grupos más fuertes, el Benidorm y el Betis B, que xueguen ente ellos, anque’l conxuntu de Cuenca nun va poner les coses fáciles a los de Paco. El primer partíu va xugase en La Fuensanta’l domingu a les 17 hores, polo que too va decidise en Mieres la fin de selmana siguiente.
 
Un equipu que quier tornar a la categoría qu’abandonó hai dos años ye’l Marino, que nun tuvo suerte nel sortéu pol ascenso al cruzase con un equipu murcianu, siempre complicaos pol potencial económicu de la Tercera d’esta comunidá. Nesta ocasión el rival ye’l Costá Calida, conxuntu de la capital que xuega en Sangonera. Los lluanquinos van contar col factor campu, yá que la vuelta va xugase en Miramar.
 
El resto de conxuntos asturianos, qu’han de pasar tres rondes p’algamar l’ascensu, van tener qu’enfrentase a equipos catalanes, canarios y castellano-manchegos. Asina, l’Universidá d’Uviéu va cruzase col Reus, el Llangréu con La Roda y el Tiuya con Las Palmas Atlético, rival que’l Sporting B descendió a Tercera nel play-off de permanencia de la temporada 2008-2009. Sicasí, hai que destacar que’l rival del Llangréu podría cambiar si sal alantre una reclamación del Villarrubia pa que l'Albacete B nun xuegue la promoción d’ascensu, yá que’l so primer equipu tien confirmáu el descensu matemáticu a Segunda B y, poro, el filial nun pue xubir de categoría. Nesi casu, l’equipu azulgrana xugaría col Almansa.
 
Toes estes eliminatories van ser siguíes con una atención especial pol Nalón y pol Xixón Industrial, puesto qu’un descensu del Caudal, xuníu al yá certificáu del Sporting B, y un fracasu de los conxuntos asturianos na fase d’ascensu arrastraría a los dos equipos a Preferente.