Fiches didáutiques

La Segunda Guerra Mundial foi’l mayor conflictu bélicu esistente hasta la fecha. Nél viéronse implicaos decenes d’estaos, ente ellos les más importantes potencies, que se dividieron en dos bandos. Duraría un total de seis años, ente’l 1939 y el 1945, tiempu nel que’l Mundu vivió terribles acontencimientos que nun se han de repetir.

El traxe tradicional asturianu ye'l que vistíen los nuesos antepasaos nel so día a día. Ésti evolucionó col pasu de los años hasta que, cola llegada de la época industrial, sustituyóse por otres prendes que saltaben les llendes de los territorios. Sería'l primer pasu de la globalización na forma de vistir.

Ún de los productos fundamentales de la nuesa gastronomía ye’l quesu. Trátase d’un productu que s’ellabora con lleche de vaca, cabra u oveya –n’otros países utilicen otros mamíferos autóctonos– dexándola cuayar y recudiendo-y la bira. Esiste una cantidá importante de variedaes de quesu, que dependen del tipu de lleche que s’utiliza –pueden llegar a amestase– y d’otros aspeutos na so ellaboración, como’l grau de curación o la cantidá de grasa.

Denomínase siderurxa a l’actividá de sacar fierro pa trabayalo y tresformalo. El fierro trátase d’un mineral duro, de color gris y mui dúctil cuando ta ingriento, esto ye, cuando ta a mui elevada temperatura. El so tratamientu dase en plantes siderúrxiques, onde se procesa pa convertilo n’arrabio y, darréu, n’aceru, una aleación de fierro y de pequeñes cantidaes de carbonu.