El sieglu XXI echó a andar esti 8-M con una manifestación histórica que colapsó Xixón

El 8-M preséntase como una fecha histórica pal feminismu, qu’entama una fuelga xeneral de 24 hores
El movimientu feminista toma les places del país y prepara la gran manifestación de Xixón
Combarros: “La xente ta falando sobre feminismu, la fienda salarial, los cuidaos y el repartu de xeres, lo que ye un ésitu"
“El movimientu feminista n’Asturies tenía nidia l’apuesta por un paru de 24 hores el 8-M”, señala Alejandra Matallanas
“El 8-M yá ta nel ambiente”
Manifestación histórica en Xixón: “Ésti ye’l nuesu sieglu y nada nin naide va podenos parar”

9 Marzu, 2018 por Pablo R. Guardado

Inicie sesión o rexístrese pa espublizar comentarios

50.000 persones, según les convocantes, participaron esti xueves na manifestación de Xixón pol 8-M, Día Internacional de la Muyer que tuvo marcáu por una fuelga xeneral feminista de 24 hores. “Güei comienza’l sieglu XXI” espresó la vocera de la Comisión 8M Asturies, Sara Combarros, al final de la histórica marcha.

Nun se recordaba nada igual en Xixón. Miles de persones esperaben p’arrancar en L’Humedal mientres la cabecera de la manifestación yá ocupaba la plaza del Marqués: “Foi un ésitu absolutu, un despliegue nunca vistu n’Asturies dende les manifestaciones del ‘Non a la Guerra’ d’hai casi venti años”, apunta Combarros.

La fuelga de desborde que pretendíen dende la Comisión 8M Asturies convirtióse en dalgo más qu’una realidá, con un siguimientu importante a lo llargo de tol día y una asistencia a la manifestación que superó la más optimista de les espeutatives. Un exemplu de que “les nueses reivindicaciones son asumíes pola mayor parte de la sociedá”, cola asistencia de xente de “toles edaes y condición”, destacando la presencia de muyeres moces.

Esta demostración de fuercia fai qu’esti 8 de marzu sía un enantes y un depués nel movimientu feminista y na esixencia de les sos reivindicaciones. “Lo que tenemos que facer agora ye valorar lo vivío estos díes depués de tantu trabayu y canalizar la respuesta. Hai que siguir avanzando p’algamar cambios na llexislación y nes posiciones de los gobiernos, qu’han de sentir lo que-yos demanda la sociedá”, destaca.

Xuntes somos más

Al final de la marcha lleóse’l manifiestu de la convocatoria, entituláu ‘Xuntes somos más’ por parte de representantes de los cuatro grupos de trabayu entamaos pola Comisión 8M Asturies pa esta xornada: llaboral, de cuidaos, estudiantil y de consumu. Les violencies machistes, la precariedá llaboral, la fienda salarial, les presiones estétiques o la reivindicación del trabayu de cuidaos foron dalgunes de los temes nos qu’afondó esti documentu que finó cola esixencia de “igualdá de derechos y condiciones de vida, y la total aceptación de la nuestra diversidá”.