“El 8-M yá ta nel ambiente”

|
Xana Ebrecht presentación 8-M 2019

Esti vienres 8 de marzu, Día Internacional de la Muyer, ta convocada una fuelga feminista de 24 hores que pretende superar la impresionante respuesta de la sociedá vivida l’añu pasáu. “El 8-M yá ta nel ambiente”, apunta Xana Ebrecht, vocera de la Comisión 8M Asturies, qu’entama esta xornada de defensa de los derechos de les muyeres.

“Les espeutatives son mui bones. Tamos trabayando muncho y tenemos el sofitu de más de cien coleutivos de toda triba: sociales, políticos, medioambientales… Tamién tamos recibiendo munchos apoyos del mundu de la cultura”, rellata Ebrecht, a la que namái-y esmolez una posible apaición de la lluvia na xornada. Sicasí, el tiempu respetará la fuelga feminista y la manifestación convocada a les 19 hores en Xixón –con salida na plaza de toros y final en L’Humedal–, yá que les previsiones de l’Axencia Estatal de Meteoroloxía (Aemet) dan dalguna probabilidá d’agua namái pela mañana.

Per segundu añu, el movimientu feminista entama un paru de 24 hores que salta l’ámbitu estrictamente llaboral. “Ye una fuelga que s’organiza en cuatro exes: llaboral, de cuidaos, de consumu y educativu”, esplica la vocera de la Comisión 8M Asturies, que recuerda que toles trabayadores tienen cobertoria llegal pa parar mientres tola xornada. Tamién les estudiantes, yá que nun se pueden realizar pruebes evaluables que puedan condicionar el so espediente.

El paru ye mestu, de muyeres y homes, “que s’encargarán de los cuidaos”, una xera que recai de manera xeneralizada en madres, güeles, fíes o hermanes. “L’ámbitu domésticu ta mui invisibilizáu”, apunta Ebrecht, que llama “a ames de casa y trabayadores del hogar a parar nesta xornada, y que saquen los sos mandiles a la ventana” pa da-y visibilidá a esta cuestión.

Xestión del ésitu

La convocatoria del 8-M del 2018 dio la oportunidá a esti movimientu que busca la igualdá de xéneru a espardir el so mensaxe énte un mayor porcentaxe de la población. Tamién a reforciar al propiu movimientu, creando comisiones que traten problemátiques de sectores concretos munches vegaes escaecíos, como’l de les muyeres del mundu rural o de les muyeres migrantes.

“Supimos aterrizar depués del ésitu del añu pasáu y nesta ocasión centrámonos en midíes o esixencies más concretes” que busquen “avanzar en derechos” y que s’espresen nos diferentes documentos por estayes difundíos pola Comisión 8M Asturies baxo la idea ‘8 midíes pal 8-M’. “Les muyeres vamos tar al pie de cañón defendiendo los nuesos derechos frente a los que quieren arrincalos”, añade Ebrecht.

‘Si nosotres paramos, párase’l mundiu’

La fuelga feminista, entamada’l baxo’l lema ‘Si nosotres paramos, párase’l mundiu’, va comenzar esta medianueche. Tán organizaos dellos piquetes informativos en Xixón, Uviéu y Avilés, que van siguir el so llabor mientres la mañana, tamién en centros educativos.

A les 12 hores tán convocaes concentraciones en toles places de los ayuntamientos del país, que van ser el preludiu de la gran manifestación de Xixón. Ésta va salir a les 19 hores de la plaza de toros y va finar en L’Humedal coles intervenciones de les voceres de la Comisión 8M Asturies y delles actuaciones musicales, como les de más de cien pandereteres de Nun Tamos Toes o del Coru Antifascista Al Altu la Lleva.

Otra manera, van habilitase mientres tol día espacios de cuidaos en Xixón, Uviéu, Avilés, Mieres, La Felguera y Nava pa facilitar l’asistencia de les muyeres a toles actividaes convocaes pa un 8-M que promete ser un pasu alantre nuevu na llucha pola igualdá real de xéneru.

Na semeya, Ebrecht atiende a los medios na rueda de prensa celebrada ayeri n'Uviéu p'anunciar el programa pa la fuelga feminista del 8-M.

Contador Estadistiques