Combarros: “La xente ta falando sobre feminismu, la fienda salarial, los cuidaos y el repartu de xeres, lo que ye un ésitu"

El xueves, 8 de marzu, Día Internacional de la Muyer, ta convocada una fuelga xeneral feminista que promete ser un enantes y un depués na llucha pola igualdá de xéneru. Sara Combarros García (Xixón, 1993), militante de l'Asamblea Moza d’Asturies (AMA), ye vocera de la Comisión 8M Asturies, que s'encarga de coordinar les movilizaciones nel país.

¿Por qué hai que parar esti 8-M?

Esti 8-M queremos parar pa visibilizar que si les muyeres paramos, párase’l mundu. Amás de visibilizar lo importante que somos, queremos denunciar una serie de fechos: queremos decir yá val a toles violencies machistes que sufrimos en toles esferes y ámbitos de la nuesa vida; queremos dicir yá val a la división sexual llaboral, que nos conderga a la precaridá más absoluta –dende la fienda salarial, pasando pel techu de cristal o la invisibilización de les muyeres rurales, y les dobles xornaes que tenemos qu’asumir, esto ye trabayar y cuidar, que nos obliguen a aceptar contratos temporales y que tien como consecuencia menos salarios, etc.–;  queremos decir yá val a que tengamos que siguir siendo nosotres les que nos encarguemos del mundu de los cuidaos, porque siguimos siendo nosotres les que facemos esti trabayu tan imprescindible y al empar tan invisibilizáu y ensin nengún tipu de compensación económica…

El movimientu feminista con esta fuelga nun quiere sólo visibilizar y denunciar, sinón que tamién iniciar un procesu de tresformación real con propuestes mui concretes y que van muncho más allá.

Trátase d’una convocatoria histórica poles sos carauterístiques.

Esta movilización tien los so anicios l’añu pasáu cuando les compañeres arxentines col lema “ni una menos, vivas nos queremos” llanzáronse a entamar la primer fuelga global de muyeres de trabayu productivu y reproductivu. Equí, nel Estáu español, celebráronse una serie de paros llaborales parciales y manifestaciones per tol territoriu que desbordaron les nueses propies carauterístiques. Esti añu quiximos dir muncho más allá y visibilizar con una fuelga más amplia que la del 2017 la nuesa fuercia, rabia y dolor, pero tamién la nuesa allegría compartida de sabenos fuertes.

Ye una convocatoria histórica porque nun ye una fuelga tradicional: ye una fuelga de desborde. Ye una fuelga que va más allá de lo que tradicionalmente identificamos o s’identifica como fuelga llaboral porque les muyeres participamos y sostenemos tolos espacios de la vida. Por eso la fuelga tien qu’alcanzar tamién otros trabayos y espacios y s’organiza en cuatro exes: fuelga de cuidaos, fuelga llaboral, fuelga de consumu y fuelga estudiantil.

¿Tán llamaos a participar tamién los homes?

Los homes tienen que sofitar ensin ser el centru y los protagonistes. Tienen qu’encargase de xeres de poca visibilidá y por supuesto de los cuidaos. Mientres el 8 de marzu los homes encargánse d’habilitar y xestionar espacios de cuidaos pa encargase de neñes y persones dependientes, y otros cuidaos –comida, cafés, etc.– pa les muyeres que va tar tol día pela cai.

¿Qué espeutatives tienen de cara a la convocatoria?

Esta convocatoria va facer historia. El martes foi un pequeñu exemplu: na plaza la Escandalera había representantes de más de 100 coleutivos sociales d’ámbitos mui diversos, dende plataformes pol mediu ambiente a asociaciones pola educación pública o pol derechu a una vivienda digna.

Ta marcando historia cuando nes selmanes últimes tán treslladándose tolos debates a les cais, a los colexos, a los chigres… La xente ta falando sobre feminismu; ta falando sobre la fienda salarial, sobre los cuidaos y el repartu de les xeres del llar. Esto yá ye un ésitu.

Va poner el ramu a too una gran manifestación en Xixón que va salir dende la plaza de L’Humedal a les 19 hores. Va encabezar esta manifestación tol movimientu feminista, y como la fuelga s’organiza en cuatro exes, nesta manifestación tratarán de visibilizase: les compañeres de consumu van dir con carros de la compra col lema ‘consumo-respetu’; les compañeras de cuidaos va dir colos mandiles, etc.

-Dalgunos partíos desmarcáronse del paru. ¿Entiende los argumentos espresaos pa nun sofitar la fuelga?

Los partíos que se desmarquen de la fuelga feminista son los que faen polítiques machistes que promueven la desigualdá y nos conducen a la precariedá más absoluta.

¿Qué va suponer esti 8-M?

Un cambiu n’Asturies y un cambiu nel Estáu. La fuelga feminista del 8-M nun ye un fin en sí mesmo, sinón que ye parte d’un procesu que ta tresformando la nuesa sociedá. Tenemos que siguir trabayando p’algamar que les propuestes tresformadores que planteagamos dende’l feminismu s’implanten. Les muyeres fiximos historia, siempre invisibilizada, y vamos volver a facer historia col 8-M; yá lo tamos demostrando.