El 8-M preséntase como una fecha histórica pal feminismu, qu’entama una fuelga xeneral de 24 hores

|
Presentación Fuelga Xeneral Feminista

'Si nosotres paramos, párase’l mundu’ ye’l lema baxo’l que se llama a un paru de 24 hores esti 8-M, Día Internacional de la Muyer, que promete ser históricu dada la movilización que se ta viviendo nos díes previos. La fuelga xeneral feminista tien cobertoria llegal y amás de llaboral ye de cuidaos, estudiantil y consumu.

Más de cien coleutivos sofiten esta iniciativa coordinada pola Comisión Asturies Feminista 8M que va comenzar esta medianueche y va tener como actu central una gran manifestación en Xixón con salida a les 19 hores en L’Humedal. El paru, llegalizáu tres la tramitación de la Confederación General del Trabajo (CGT) énte’l Ministeriu d’Emplegu y Seguridá Social, ta convocáu respondiendo al pidimientu d'Asturies Feminista 8M, amás de por esti sindicatu, pola Corriente Sindical d’Izquierda (CSI), el Sindicatu Unitariu Autónomu de los Trabayadores de la Enseñanza d’Asturies (SUATEA) y la Confederación Nacional del Trabajo (CNT), mentes qu’UXT y CC OO llamen a paros parciales de dos hores: de 11.30 a 13.30 hores, de 16 a 20 hores o de 23 a 1 hora.

Dende los díes previos ta viviéndose n’Asturies una gran movilización al rodiu d’esta fuelga xeneral, lo que convida a pensar nun siguimientu ampliu nuna fecha que se presenta histórica. Trátase del primer paru de 24 hores d’esti calter que s’entama nel país y que va más allá de lo llaboral, yá que tamién algama l’ámbitu de los cuidaos.

Asina, llámase a les muyeres a dexar estos llabores mientres tola xornada cola fin de reivindicalos y, al empar, demandar qu’éstos nun recaigan namái nelles. Nesi sen, les organizadores convoquen tamién al paru a los homes, pa encargase de les xeres doméstiques y garantizar los cuidaos mentes estes 24 hores.

Nun son lo llaboral y los cuidaos les exes úniques d’esta fuelga xeneral femenista de denuncia de les desigualdaes esistentes por cuestión de xéneru y de reivindicación del papel de la muyer. Trátase tamién d’un paru estudiantil y de consumu, llamando a nun mercar nengún productu o serviciu que nun sía imprescindible y a evitar les compres en comercios onde les muyeres tengan males condiciones llaborales y vitales, encamentando al mesmu tiempu a facer un consumu consciente y sostenible nel día a día.

Mandiles a la ventana

El comienzu de la fuelga ta previstu pa esta medianueche, cuando van organizase piquetes n’Uviéu (plaza Porlier) y Avilés (El Parche). A les 8 hores van entamase otros en bicicleta n’Uviéu (plaza de Castilla) y Xixón (L’Humedal) y, media hora más tarde, ún estudiantil na Facultá de Bioloxía y na Universidá Llaboral, convocándose ún social a les 10 hores onde l’avilesina estatua La Monstrua.

A les 12 hores van celebrase concentraciones en tolos places de les cases conceyu del país, mentes qu’a les 19 hores va echar a andar la gran manifestación de Xixón. D’igual forma, a lo llargo del día van habilitase espacios de cuidaos, comida y bébora pa facilitar la realización de la fuelga.

Dende la Comisión Asturies Feminista 8-M animen tamién a toles muyeres a colgar un mandil de la ventana pa visibilizar la fuelga de cuidaos y el so sofitu a la convocatoria d’una xornada que promete ser un enantes y depués na llucha pola igualdá de xéneru.

 

 

Contador Estadistiques