Manifestación histórica en Xixón: “Ésti ye’l nuesu sieglu y nada nin naide va podenos parar”

|
Manifestación 8-M en Xixón

Xixón vivió esti 8-M una xornada histórica con una manifestación pola fuelga feminista na que participaron más de 100.000 persones, según les convocantes. “Ésti ye’l nuesu sieglu y nada nin naide va podenos parar” declárose en L’Humedal pa zarrar l’actu mientres siguía saliendo xente de la Plaza de Toros El Bibio.

Los dos quilómetros de vía que separtan estos dos puntos de Xixón taben nesi momentu ocupaos por miles y miles de ciudadanos. Mientres los concentraos na cai Palacio Valdés, la de L’Acerona, sentíen la llectura del manifiestu ellaboráu pola Comisión 8M Asturies, disfrutaben de les actuaciones del Coru Antifascista Al Altu la Lleva y de les pandereteres de Nun Tamos Toes y glayaben conseñes feministes, la carretera la Costa siguía poblada de xente que nun pudo asistir a la conclusión del actu.

Nun importó. L’ésitu de la convocatoria yera suficiente motivu pa los presentes pa llevar una sonrisa na cara.

Y ye que si l’añu pasáu dende’l micrófonu glayóse que “güei comienza’l sieglu XXI”, nesta ocasión confirmóse, con una asistencia mui superior, que “ésti ye’l nuesu sieglu y nada nin naide va podenos parar”.

“El 8-M sigue güei”

El sábadu, un día depués de la esitosa convocatoria, la Comisión 8M Asturies asoleyó un comunicáu nel qu’afirma que “el 8-M sigue güei. Les nueses reivindicaciones han de ser escuchaes y los nuesos pidimientos han de convertise en lleis. Porque vinimos pa quedanos y amosámoslo con otra xornada histórica que-y dixo a la derecha y al fascismu que deben tener nidio que nos tendrán enfrente defendiendo los nuesos derechos. Por mucho que lo intenten, el feminismu sigue siendo combativu, anticapitalista y en defensa de les muyeres más precarizaes; porque somos un movimientu tresformador de la sociedá y non un productu que vender. Somos imparables”.

La organización destacó “el paru masivu nel ámbitu educativu y tamién un paru del 51 por cientu na Xusticia asturiana, que ye un datu hisóricu”, recordó la presencia na manifestación de munches neñes y neños, asina como de muyeres rurales “qu’acudieron organizes per primer vegada”, y fixo mención de les munches persones que nun pudieron asistir, esto ye, “trabayadores internes en cases, trabayadores n’emplegos precarios y amenazaes de despidu”.

Contador Estadistiques