El movimientu feminista toma les places del país y prepara la gran manifestación de Xixón

|
Concentración Plaza Mayor de Xixón 8M

Les places de les cases conceyu de les principales ciudaes del país quedaron pequeñes p’acoyer a les miles de persones que s’averaron a participar nes concentraciones entamaes al meudía esti 8-M, Día Internacional de la Muyer. A les 19 hores va salir en Xixón una manifestación que promete tener una participación masiva.

Xixón, Uviéu y Avilés foron los llugares onde más xente acudió a la llamada nesta xornada onde ta celebrándose una fuelga xeneral feminista dividida en cuatro exes: llaboral, de cuidaos, estudiantil y de consumu. La Comisión Asturies Feminista 8M, que coordina la convocatoria, señala un siguimientu altu del paru, destacando en sectores como la Educación o’l tresporte.

El moráu ta chiscando de color les cais de toda Asturies nuna xornada histórica pal movimientu feminista. Dau’l siguimientu nes primeres hores del día, espérase una participación masiva na manifestación convocada baxo’l lema 'Si nosotres paramos, párase’l mundu’. La salida ta prevista a les 19 hores en L’Humedal.

Na semeya, imaxe de la concentración celebrada en Xixón.

Contador Estadistiques