La Coordinadora Ecoloxista quier otres alternatives al AVE del Cantábricu

La Coordinadora Ecoloxista d'Asturies afita qu'énte "les continues declaraciones sobre les bondaes p'Asturies del Tren d'Alta Velocidá (AVE) Cantábricu, queremos reclamar qu'enantes de marafundiar recursos públicos que son limitaos habrá qu'estudiar si esta ye la meyor opción ambiental y económica pa meyorar el serviciu ferroviariu que yá tenemos y valorar adecuadamente si'l fuerte impactu ambiental ye asumible".

Pa la CEA "supondría un descomanáu impactu n'Asturies, supondría ocupar permanentemente una franxa mínima de 30 metros, nuna zona como la marina asturiana, un espaciu de corta estensión y mui limitáu poles actuales poblaciones y les infraestructuras existentes (Autovia, N-634, Feve). Hai que recordar que'l tren d'alta velocidá nun vertebra'l territoriu porque namás permite paraes a distancies non inferiores a 40 Km. pa poder permitir algamar les altes velocidaes. Como muncho, tendríemos 4 paraes n'Asturies".

Finalmente la Coordinadora Ecoloxista d'Asturies conseña que nel nuesu país "esta infraestructura na costa nun ye una necesidá y en cambiu si tenemos otres necesidaes pa gastar estos millones d'euros de fondos públicos. Lo qu'hai que trabayar ye n'ameyorar el serviciu actual de FEVE que yá tenemos" yá que "anguaño nesi tramu costeru tenemos 78 estaciones ferroviaries. El tiempu que lleva güei percorrer esos 200 kilómetros en FEVE, ente A Veiga y Colombres, supón 7 hores y 20 minutos. Ente esi tiempu, llargu enforma y la rapidez de menos d'una hora que supondría l'AVE, existen otres opciones ambientalmente más razonables y socialmente más ventayoses".