El Puertu de Xixón niega que la solicitú de fondos pa El Musel contradixere una circular d'Economía

L'Autoridá Portuaria de Xixón negó que la solicitú de financiación adicional pa les obres d'ampliación del Puertu d'El Musel (Xixón) se realizare a la escontra d'una circular del Ministeriu d'Economía sobre certificación de gastos, tal y como señaló ayeri'l PP nuna rueda prensa.

   De fechu, l'Autoridá Portuaria, al traviés d'una nota prensa, dixo que foi precisamente'l Ministeriu d'Economía, por pidimientu y de Puertos del Estáu, el que presentó ante la Unión Europea la solicitú de modificación de la decisión y algame de nuevos fondos pa la obra d'ampliación del puertu d'El Musel.

   Según l'Autoridá Portuaria la Circular 1/2007 nun diba afeutar a la modificación del contratu d'obra d'ampliación del Puertu de Xixón, dao que yá se fizo con arreglu a lo dispuesto nes Normes de contratación del Puertos del Estáu, y de les Autoridaes Portuaries, y non según l'artículu 101 del Testu Refundíu de la Llei de Contratación de les Alministraciones Públiques.

   "Asina pues, el Ministeriu del Gobiernu d'España fizo suya la esclusión de l'aplicación de la Circular 1/07 pa la solicitú de modificáu de la obra d'El Musel y, poro, en marzu del 2008, presentó, ante la Unión Euroopea, la propuesta de solicitú de modificación de la decisión pa solicitar nuevos fondos pa la obra d'ampliación", señalaron.

   Les obres d'ampliación del Puertu d'El Musel, en Xixón, entamaron nel añu 2004, a cargu de la unión temporal d'empreses Dique Torres y con un presupuestu de 579,2 millones. Sin embargu, posteriormente l'Autoridá Portuaria almitió que les obres diben costar 251 millones más, dalgo qu'atribuyó a diferentes causes, como la imposibilidá de recurrir a una cantera de materiales cola que se contaba de primeres.

   Asina, el Gobiernu español acabó solicitando esos 135 millones a la Unión Europa a cargu de los fondos de cohesión. Formaciones polítiques como Los Verdes consideraron l'aumentu de coste inxustificáu y asina lo ficieron saber n'Europa, que denegó esos fondos, al considerar que s'incumplió la normativa europea de contratación pública, según confirmó'l vienres el voceru de Política Rexonal de la Unión Europea, Dennis Abbot.