Bilordios Filolóxicos por Ramón d'Andrés
Dellos conseyos pa encuriosar l'estilu (18/11/02)
Cuando se redacta daqué n'asturianu, lo primero -sobra dicilo- ye axustase a les regles gramaticales del idioma, pero, además, podríen dase conseyos pa evitar usos que, nun siendo propiamente incorrecciones, enfeen o aprobecen los testos. Catái equí dellos:
1. Nun abusar de sustantivos qu'espresen acciones o procesos. Un testu allixérase por demás si talos sustantivos s'alternen con otres posibilidaes, como l'infinitivu o formes conxugaes. Exemplos: La corrección de tol llibru foi un llabor abegosu - Correxir tol llibru foi un llabor abegosu; La prohibición de la conxelación de célules equival a la renuncia al progresu - Prohibir conxelar célules equival a renunciar al progresu; Condena de seis años al lladrón de xalés - Condenen a seis al lladrón de xalés; Espublizamientu d'un nuevu discu de jazz - Espublízase un nuevu discu de jazz.
2. Nun abusar de los posesivos. La llingua asturiana tien enclín a almitilos namái cuando fai falta dexar clara la relación ente dos términos, sía pa desfacer una ambigüedá, sía pa espresar un énfasis. Exemplos: Denuncien a un conceyal por aparcar el coche en sitiu prohibíu, meyor que Denuncien a un conceyal por aparcar el so coche en sitiu prohibíu; El presidente tien problemes colos ministros, meyor que El presidente tien problemes colos sos ministros; Sadam Husein caltién el puestu nuna tarrecible dictadura, meyor que Sadam Husein caltién el so puestu nuna tarrecible dictadura.
3. Nun abusar d'"asturianismos densos", ye dicir, de palabres mui estremaes del castellanu pol simple fechu de ser diferentes. Ta claro que ye correcto usar palabres como entrugar, escaecer, esmolecer, prietu, espoxigar, furrular, murnia, esnalar, glayar, iguar, dixebrar, estremáu, sero, aportar, tornar, emplegar, vegada, pero da-y una ríxida probitú al testu quitase d'usar otres tamién asturianes por tener el "defectu" de ser paecíes al castellanu: preguntar, olvidar, preocupar, negru, crecer, funcionar, tristeza, volar, gritar, preparar, separar, diferente, tarde, llegar, volver, traducir, utilizar, vez, etc.
4. Nun abusar de la pasiva. Les oraciones en voz pasiva nun son corrientes nel asturianu faláu; abusar d'elles na llingua escrita resulta bien pesao y artificial. Suenen más naturales les correspondientes oraciones en voz activa: Les sos opiniones foron xulgaes pola xente como una amenaza - La xente xulgó les sos opiniones como una amenaza. Otra salida ye usar un verbu impersonal, sía cola 3ª persona del plural o col pronome SE: Les sos opiniones foron xulgaes mal = Xulgaron mal les sos opiniones = Les sos opiniones xulgáronse mal; Eso será propuesto nel conceyu = Eso propondráse nel conceyu = Eso propondránlo nel conceyu.
5. Dar xuegu a sinónimos o espresiones más o menos equivalentes. Un escritu gana prestura y gracia si l'autor sabe sacar provechu de la bayura léxica del idioma. Exemplos: Anque: magar que, por más que; Cuando: de la que, en cuantes que; Pa que: al oxetu de, al envís de que, n'esficies de; Dende que: desque, de magar, de que; Si: nel casu de que, nel supuestu de que, si acaso; Enriba: encima, sobre; Debaxo: embaxo, baxo, so; etc.
6. Nun abusar de palabres de conteníu mui xenéricu. L'abusu d'esa mena de palabres produz sensación de probitú sin matices. Exemplos: Ser: constituyir, equivalir a, consistir en, resultar; Tar: andar, atopase, alcontrase; Facer: llevantar, iguar, aperiar, entamar, tresnar, realizar, construyir; Dicir: espresase, amestar, añedir, retrucar, repostiar, contestar, responder; Pensar: camentar, suponer, cuidar, atalantar, opinar, creyer; Querer: desear, naguar, apetecer, petar; Dar: apurrir, allargar, ufrir, ofrecer, ufiertar; Dir: treslladase, empobinar, enveredar, empobinar, viaxar; Tener: poseyer, contar con, tar dotáu de; etc.
7. Axustar les espresiones al rexistru propiu del testu. Esti conseyu val sobremanera pa nun usar palabres informales o abondo coloquiales nun testu formal. Nos siguientes exemplos, la palabra de rexistru neutral apaez al principiu, y darréu les equivalencies de rexistru informal: Pierna: pata; Oreyes: toreyes; Cara: focicu; Cabeza: tiesta, mollera, sesera, morra, calamona; Nariz: ñaples, ñarres; Robar: h.ispiar, mangar; Borrachera: pea, mocu; Falar: charrar, dar la parpayuela; etc.
