La selmana última rexistró una media diaria de 125 contaxos

Les tases de positividá baxaron esta fin de selmana del 5 por cientu a esceición del domingu, cuando s'asitió nel 5,86 por cientu.

A falta de conocer los datos oficiales de la COVID-19, la Conseyería de Salú comunicó 408 contaxos esta fin del selmana: 174 el vienres, 92 el sábadu y 142 ayeri. Na selmana pasada el númberu de positivos detectaos pasó de 24.691 a 25.566, 875 más, polo que la media de casos diaria quedó en 125, confirmándose la tendencia descendente d'esta segunda fola de la pandemia.

Na anterior fora 194, cuando descendiera dende 252. Dende qu'Asturies.com vien calculando esti datu a lo último d'agostu la evolución foi la siguiente: 39, 46, 52, 83, 92, 92, 150, 210, 272, 334, 408, 508, 344, 252 y 194 hasta los 125 actuales.

Cifres meyores

Nos trés díes últimes la tasa de positividá tamién vivió descensos, anque ayeri tornó a superar el 5 por cientu que marca la Organización Mundial de la Salú (OMS) pa tener controlada la pandemia, asitiándose ésta nun 5,86 por cientu. El vienres quedara en 4,28 y el sábadu, en 3,41.

Descienden tamién les muertes, anque les cifres siguen siendo tráxiques. Esta fin de selmana finaron 25 persones, 17 muyeres y 8 homes (14 el vienres, 7 el sábadu y 4 ayeri) que ponen el total del andanciu en 1.238.

Hai hospitalizaes 483 persones con confirmación o sospecha de COVID-19, a los qu'hai que sumar otres 110 que tán na UCI. Son 66 y 7 menos que'l xueves.