La media diaria de contaxos na selmana última quedó en 101

|
Coronavirus SARS-CoV-2 azul

Sigue la tendencia descendente de la pandemia nel país, con 226 positivos nos trés díes últimos y cola tasa de positividá perbaxo del 5 por cientu que marca la OMS.

Enantes d'espublizar los datos oficiales de la COVID-19 –qu'aumenten la cifra de positivos hasta los 251– correspondientes a la fin de selmana, la Conseyería de Salú comunicó 71 casos nuevos ayeri, a los qu'hai que sumar los 95 del vienres y los 60 del sábadu. Nos sietes díes últimos detectáronse 705 contaxos, pasando de 25.566 a 26.271, lo que signifiquen 101 diarios de media.

D'esta forma sigue la evolución descendente dende que na selmana del 9 al 16 de payares s'algamara'l tope de la segunda fola, con 508. Desque Asturies.com vien calculando esti datu a lo último d'agostu la evolución foi la siguiente: 39, 46, 52, 83, 92, 92, 150, 210, 272, 334, 408, 508, 344, 252, 194 y 125, hasta los 101 actuales.

No que se refier a la tasa de positividá, ésta sigue perbaxo del 5 por cientu que marca la Organización Mundial de la Salú (OMS) pa tener controlada la pandemia. El vienres foi del 3,82 por cientu, el sábadu del 2,58 por cientu y ayeri del 4,96 por cientu.

17 finaos

Entovía nun desapaecen les muertes cola enfermedá pol coronavirus SARS-CoV-2, anque les cifres son menores qu'en payares, el mes más prietu del andanciu. Esta fin de selmana finaron 6 persones el vienres, 2 el sábadu y 9 ayeri, en total 17, 12 muyeres y 5 homes, anque les cifres oficiales ampliaron la cifran hasta les 21 que ponen el global en 1.299.

Hai hospitalizaos 327 pacientes con confirmación o sospecha de COVID-19, a los qu'hai que sumar 79 que tán na UCI. Son 34 y 2 menos que'l xueves, de manera respeutiva.

Contador Estadistiques