La tasa de positividá de COVID-19 baxa al 4,04 por cientu esti xueves

Na xornada rexistráronse 127 contaxos y un total de 15 persones perdieron la vida.

La Conseyería de Salú notifica qu'ayeri la tasa de positividá s'asitió nun 4,04 por cientu tres la realización de 5.523 pruebes diagnóstiques d'infeición activa. Ye menor del 5 por cientu que marca Organización Mundial de la Salú (OMS) como llende pa tener controlada la pandemia y supón una baxada con respeuto a la cifra del miércoles, que foi del 5,90 por cientu.

Esi día hebo 122 contaxos, 5 más qu'ayeri, cuando se detectaron 127 –los datos oficiales xuben la cifra hasta 134 por positivos non contabilizaos d'otros díes–. El total de la serie queda, poro, en 25.151.

Hai que llamentar la muerte de 15 persones: ocho muyeres de 93, 92, 89, 86, 86, 82, 74 y 69 años, y siete homes de 94, 87, 85, 84, 83, 79 y 65, de los que trés teníen residencia nun centru de mayores. Dende que principó l'andanciu finaron 1.213 persones cola enfermedá causada pol coronavirus SARS-CoV-2 tres retirase una perda humana de la serie que se sumara por error.

A medianueche había hospitalizaos 549 pacientes con confirmación o sospecha de COVID-19, a los qu'hai que sumar otros 117 que tán na UCI. Son 26 y 6 menos que'l miércoles, de manera respeutiva.

18 biltos en residencies

La conseyería detectó ente'l 1 y el 7 d'avientu un total de 18 biltos en residencies de mayores, 4 menos que la selmana anterior. En total contabilizáronse 160 casos nuevos, ente internos y trabayadores.

Les autoridaes sanitaries intervienen cuando se da un primer contaxu, anque se cuenten como brotos cuando hai al menos trés. Nesi sen, nesti periodu confirmaróse casos n'otros 30 centros residenciales.