La media de contaxos diarios baxa de 200

En trés selmanes pasó de 508 a 194.

Asturies rexistró 1.355 contaxos la selmana pasada. El domingu 29 de payares el país contaba con 23.336 casos de COVID-19 confirmaos por PCR y ésti pasáu la cantidá ascendía a 24.691.

Supón una media nesos 7 de díes de 194 positivos diarios, cuando nos anteriores yera de 252. D'esta forma confírmase la baxada de la curva nesta segunda fola de la pandemia depués d'algamar un picu de 508 na selmana del 9 al 15 de payares.

La evolución dende qu'Asturies.com entamó a contabilizar esti datu n'agostu, foi la siguiente: 39, 46, 52, 83, 92, 92, 150, 210, 272, 334, 408, 508, 344 y 252, hasta los 194 actuales.

Últimos datos

Les cifres de la ponte festiva confirmen tamién esta tendencia. El vienres detectáronse 176 casos nuevos, el sábadu 226, el domingu 115, el llunes 100 y ayeri 104, estes trés xornaes últimes con unes 2.000 PCR feches menos que nes anteriores.

No que respeuta la tasa positividá, ésta sigue estabilizada al rodiu del 5 por cientu que marca la Organización Mundial de la Salú (OMS) pa tener controlada la pandemia. Asina, nestos últimos díes foi de 5,10 por cientu, 6,33 por cientu, 5,99 por cientu, 4,83 por cientu y 5,75 por cientu.

Lo que sigue en niveles altos son les muertes cola enfermedá causada pol coronavirus SARS-CoV-2. Nestes cinco xornaes rexistráronse 60 finaos (15, 13, 6, 15 y 11), que ponen el total en 1.135 dende que principió l'andanciu.

Por último, ayeri taben hospitalizaes 588 persones con confirmación o sospecha de COVID-19, 81 menos que'l xueves. Na UCI siguen 129 pacientes.