La lliteratura n’asturianu y gallego-asturiano va tener presencia en Frankfurt y n'aiciones del ministeriu

La Frankfurter Buchmesse, el mayor eventu editorial a nivel mundial, va tar dedicáu nel 2022 a España y la lliteratura n’asturianu y gallego-asturiano va tener presencia na feria. Ye ún de los compromisos algamaos pola conseyera Berta Piñán y Antón García nun aconceyamientu nel llar del Ministeriu de Cultura, que tamién va incluyir a los dos idiomes nos sos programes de fomentu de la llectura.

María José Gálvez, direutora xeneral del Llibru y Fomentu de la Llectura, foi la persona que recibió ayeri a la responsable de Cultura, Política Llingüística y Turismu y al direutor xeneral de Política Llingüística. La valenciana confirmó una actividá propia pa la nuesa lliteratura dientro del programa oficial de la importante feria alemana, na que se negocien el 80 por cientu d’autor globales, según espresa la web entamada Ministeriu de Cultura y Deporte pola invitación d’honor a España, que toma’l relevu de Canadá, na edición del 2022.

Los representantes del Gobiernu tamién treslladaron la necesidá de dar visibilidá a les creaciones n’asturianu y gallego-asturiano incluyéndoles tanto nes campañes de fomentu a la llectura que ponga en marcha’l ministeriu como nes actividaes de promoción. Nesi sen Gálvez aceptó la incorporación d’entrambos idiomes en dos programes del so departamentu: los ‘Alcuentros lliterarios n’ IES’, destinaos a fomentar la llectura entre l’alumnáu, y los alcuentros d’autores en llibreríes nel marcu del programa ‘Afinidaes eleutives’.

El primeru consiste na presencia en centros educativos d’autores p’aldericar colos alumnos de Secundaria, que previamente preparen l’actividá cola llectura del material seleicionáu. L’escritor fala en primer llugar del so trabayu y procesu creativu, pa depués dar la pallabra a los escolinos.

Mentes, l’otru programa ta dirixíu a llibreríes independientes y tien l’oxetivu d’apoyar la creación lliteraria, poniendo en valor la pluralidad llingüística del Estáu, favoreciendo’l diálogu ente distintes llingües y contribuyendo a la difusión d’obres de distintos territorios. Asina entámense alcuentros en ente dos escritores y traductores, qu’animen a referise al trabayu y obra del otru, buscando asemeyances, conexones y inclusive caminos diverxentes.

A la inclusión de la lliteratura escrita n’asturianu y en gallego-asturiano nestos programes ministeriales añadiráse tamién la so participación nel Encuentro de Escritores y Críticos de las Letras Españolas, que cada añu tien llugar na población llanisca de Pendueles (Llanes) en collaboración cola Universidad de Salamanca (USAL), y la incorporación de les obres espublizaes nos dos idiomes nel catalógu de les biblioteques del Estáu. Por último, Gálvez comprometióse a usar la llingua asturiana nel campañes de promoción entamaes pol so departamentu dende yá.