Asturies lleva a la Frankfurter Buchmesse un puestu propiu y representación d’escritores n’asturianu

Dende esti miércoles y hasta’l domingu ta celebrándose la Frankfurter Buchmesse, el mayor eventu editorial a nivel mundial, qu’esti añu tien a España como convidáu d’honor. El Ministeriu de Cultura y Deporte lleva hasta Frankfurt am Main a Xuan Bello como representante de la lliteratura n’asturianu, mentes qu’Asturies, que cuenta con puestu propiu, desplaza a Francisco ‘Paco’ Álvarez y Laura Marcos.

Esta mañana inauguróse l’actividá ferial, actu nel que tuvieron presentes los reis d’España, de viaxe d’Estáu n’Alemaña. Una edición, la sententena cuarta, con 4.000 espositores de 85 países na que se torna a la normalidá depués de dos marcaes pola pandemia de COVID-19, polo que s’espera una cifra de visitantes cercana a la de 302.267 del 2019.

España repite como invitada d’honor 31 años depués y acude nesta ocasión con un pabellón de 2.000 metros cuadraos y con 200 escritores, traductores y ilustradores. Nesta ocasión la llingua asturiana ta representada, en concreto por Bello, que’l sábadu al meudía va participar nel nomáu ‘Escenario Cereza’ nel eventu profesional ‘Granta en español 24: Poéticas del lenguaje’ xunto cola madrilana Julia Valero y l’escritor en gallegu Xesús Fraga, amás de la cofundadora de la revista, Valerie Miles.

Mentes, estrénase na Frankfurter Buchmesse con puestu propiu Asturies. La Conseyería de Cultura, Política Llingüística y Turismu ponlu a disposición del Gremiu d’Editores Asturianos y de les editoriales del país pa proporcionar a los profesionales del sector un espaciu de negociu onde desendolcar les sos actividaes na feria coles máximes facilidaes.

Cola idea de repetir n’ediciones próximes

En total hai representación d’una decena d’editoriales que trabayen les trés llingües que se falen n’Asturies y el Serviciu d’Espublizaciones de la Universidá d’Uviéu, a lo qu’hai que sumar la presencia en Frankfurt am Main del escritor y periodista Álvarez y de l’autora y filóloga de la direición xeneral, Marcos. “Tamién hai una pequeña muestra que lleva la propia conseyería de publicaciones de cultura xermánica traducíes al asturianu”, confirmó a Asturies.com Antón García, direutor xeneral de Política Llingüística, qu’esplicó qu’esti primer añu ye una primer toma de contautu “pa ver les necesidaes que pueda haber de cara a años siguientes”.

“La idea ye usar el stand pa facer un intercambiu con otres axentes lliterarios, porque realmente Frankfurt nun ye una feria espositiva; ye una feria de negocios. Lo que se fai ye comprar y vender derechos, y habrá que dir vendiendo como se desarrolla esta iniciativa y ver qué posibilidaes hai, aprovechales, y tomar nota pa siguientes ediciones”, añadió. “Ye un esfuerciu importante pa la conseyería, pero ta dientro d’esa idea que tenemos de dar a conocer la realidá cultural en toles llingües que tenemos n’Asturies”, pa lo que cuenten cola collaboración d’otres entidaes, “como esti gremiu que ta trabayando munchu y bien pola cultura d’Asturies”.

Na semeya, puestu d'Asturies na Frankfurter Buchmesse, con Álvarez nel so interior.