El programa del ministeriu ‘Afinidaes Eleutives’ incorpora per primer vegada l’asturianu

El Ministeriu de Cultura y Deporte ta acabante de convocar el programa ‘Afinidaes Eleutives. Alcuentros lliterarios en llibreríes’, que per primer vegada incorpora la llingua asturiana. Ta destináu a les llibreríes independientes que van acoyer alcuentros ente escritores y traductores.

Ésti yera ún de los compromisos adquiríos por María José Gálvez, direutora xeneral del Llibru y Fomentu de la Llectura, cola conseyera Berta Piñán y con Antón García. Esta selmana salió la convocatoria, na qu’a les llingües oficiales sumen el ‘bable’ y el ‘leonés’ xunto col aragonés.

“Les llibreríes independientes acueyen los alcuentros ente dos escritores y traductores que desendolquen el so trabayu nes diferentes llingües (castellanu, catalán, gallegu, eusquera, valencianu, aranés, bable, aragonés y lleonés), animando a caún d’ellos a referise al trabayu y a la obra del otru, buscando asemeyances, conexones, y inclusives caminos diverxentes”, espliquen dende’l ministeriu. Son los propios establecimientos, que tienen hasta’l día 31 pa solicitar tomar parte del programa, con actividaes previstes ente’l 21 de xunu y el 22 d’ochobre, los que, en función del so públicu, el so fondu y la so llinia de programación, los que propondrán la participación a los dos creadores de diferentes llingües y alcordarán con ellos los temes a tratar y la fecha de celebración.

La Direición Xeneral del Llibru y Fomentu de la Llectura va xestionar, al traviés de la Subdireición Xeneral de Promoción del Libru, la Llectura y les Lletres Españoles, el pagu de 390 euros d’honorarios a los autores y, nel so casu, de los gastos de desplazamientu y agospiu. El programa tien un tope de 70 actividaes, cola participación de 140 creadores.

‘Afinidades Eleutives. Alcuentros lliterarios en llibreríes’ tien como oxetivos “per una parte, impulsar l’actividá en libreríes independientes y, per otra, apoyar la creación lliteraria en toles llingües propies del Estáu, poniendo en valir la pluralidá llingüística del nuesu país, favoreciendo’l diálogu ente les distintes llingües y contribuyendo a la difusión de lliteratures de distintos territorios”, añaden.