El Ministeriu de Cultura yá tien en cuenta al asturianu nes sos actividaes

|
Cartelu asturianu Día del Llibru 2021 ministeriu

Esti llunes María José Gálvez, direutora xeneral del Llibru y Fomentu de la Llectura, presentó en compañía del direutor del Instituto Cervantes, Luis García Montero, los actos previstos na ‘semana cervantina’ con motivu del Día del Llibru. El cartelu de la xornada edítase en “toles llingües del Estáu, tanto llingües oficiales como llingües propies”, incluyendo asina per primer vegada l’asturianu.

La incorporación del idioma nes actividaes del Ministeriu de Cultura y Deporte, y más en concreto nes entamaes pol so departamentu, foi un compromisu de Gálvez cola conseyera Berta Piñán y Antón García, direutor xeneral de Política Llingüística, nun aconceyamientu celebráu en Madrid hai dos selmanes. Ayeri esti cambiu hacia l’asturianu escenificóse per primer vez, anque refiriéndose a la llingua asturiana como bable.

Amás de n’asturianu, el cartelu tamién s’espublizó en toles llingües oficiales y n’aragonés. Lo llamativo del casu de la versión asturiana ye que pue descargase baxo dos epígrafes, ‘bable’ y ‘leonés’.

Con ilustración de Sonia Pulido, Premio Nacional de Ilustración 2020, trai un testu orixinal en castellanu de Francisco Brines, Premio de Literatura en Lengua Castellana Miguel de Cervantes 2020 que sirve d’inspiración pal dibuxu de la catalana. Arriba pon en grande ‘Día del Llibru 2021’ y incorpora n’asturianu los testos qu’espliquen los méritos de los dos autores.

Los actos conmemorativos del Día del Llibru, 23 d’abril, principiaron ayeri y van allargase hasta’l mesmu vienres. Pa consultar el programa completu ha calcar equí.

Contador Estadistiques