La intención de VOX de nun programar a artistes qu'usen l'asturianu, la noticia con más visites nel 2023 n'Asturies.com

Éstes son les diez informaciones que más interés xeneraron ente los nuesos llectores l'añu pasáu.

'Nun cantar nin actuar n'asturianu, condición pa contratar en Xixón' yera'l títular de la información que rexistró más visites nel 2023 n'Asturies.com. Espublizóse'l 23 de xunu, día na que se prenden les fogueres de San Xuan, y recoyía unes declaraciones feches por Sara Concepción Álvarez Rouco, naquel momentu conceyala de Festexos por VOX, na emisora de Xixón d'Onda Cero.

Éstes crearon una gran polémica y movilización social nel conceyu y nel país, qu'obligaron a la edil y al so ex compañeru Óliver Suárez Rubio a convocar una rueda de prensa'l 3 de xunetu pa tratar de matizar les sos pallabres, anque lo que fixo foi echar enguedeyar más la situación. “Si la promoción del espectáculu n’asturianu va ser una plataforma d’apoyu a la oficialidá de la llingua, nós nun vamos apoyalo”, afirmó, al tiempu que confirmó que diba estudiar primero la trayeutoria de los artistes enantes de contratalos.

Poco díes depués dábase a conocer la creación de la plataforma 'Música n'asturianu sí' que llevaría una moción al Plenu d'agostu "en defensa y promoción de la música y cultura n’asturianu en Gijón/Xixón, especialmente nos eventos festivos, educativos y culturales”, presentada por Podemos, PSOE y Convocatoria por Xixón. Ésta salió alantre col apoyu de tolos partíos a esceición de VOX y la nuesa cobertoria de la mesma tamién foi d'interés de los llectores, al convertise na tercer noticia más vista del 2023.

La trayeutoria de Álvarez Rouco nel equipu de gobiernu finó'l 4 d'ochobre con otres polémiques declaraciones, nesti casu sobre'l Festival Internacional de Cine de Xixón. Suárez Rubio, que sigue presidiendo Divertia como cuando aquella rueda de prensa de xunetu y que ta siendo un apoyu fundamental pa Foro y PP pa la so aición executiva, abandonaba VOX darréu y pasaba a ser conceyal non adscritu.

La llista

Les noticies más lleíes esti 2023 incluyénse nesta llista y pueden consultase calcando sobre elles. Al empar deseamos un perbón 2024 a los nuesos llectores, añu nel qu'Asturies.com va siguir siendo fiel a la cita diaria cola información d'Asturies y del mundu.

1. Nun cantar nin actuar n'asturianu, condición pa contratar en Xixón
2. La estación de La Pola pierde'l topónimu oficial pa llucir de vuelta'l derogáu 'Pola de Lena'
3. El Plenu de Xixón aprueba por práutica unanimidá la proposición en defensa de la música n’asturianu
4. Strangis Guajes decide nun tocar nel Tsunami
5. Podemos abre un espediente a Xune Elipe: “Ye una inxusticia, siento tristura y rabia, pero dieron en duru”
6. La toponimia asturiana apaez nos indicadores nuevos de la 'Y'
7. La entrada de VOX na conceyalía de Festexos de Xixón toca al Tsunami
8. La Conseyería d’Educación nun acepta’l so propiu títulu de C1 d’asturianu col argumentu de que “no es idioma oficial”
9. La viñeta n'asturianu qu'algamó un millón y mediu d'impresiones na rede social Facebook
10. Los actos festivos del Día d'Asturies van tener Llaviana como sede

Na semeya, Álvarez Rouco y Suárez Rubio na rueda de prensa del 3 de xunetu.