La toponimia asturiana apaez nos indicadores nuevos de la 'Y'

La insistencia del Gobiernu a Demarcación de Carreteres del Estáu a cumplir cola llegalidá abre "una nueva etapa" nel usu de los nomes oficiales nos viales de titularidá estatal.

Les obres d'ampliación a un tercer carril de l'autopista 'Y', que yá enfoquen el so tramu final, dexen ver los indicadores nuevos. Éstos rescamplen por emplegar la toponimia asturiana, única oficial, dalgo que se venía faciendo nos viales que dependíen del Gobiernu d'Asturies pero que nun se respetaba nes que lo facíen del Ministeriu de Tresportes, Movilidá y Axenda Urbana.

"Agora, cola collaboración de Delegación de Gobiernu, empieza una nueva etapa na que Demarcación de Carreteres n'Asturies fai usu tamién de los topónimos oficializaos", apunten dende la Direicón Xeneral de Política Llingüística, qu'enantes yá fixera xestiones asemeyaes con Correos y Renfe/Feve. Los primeros cartelos correutos yá se pueden ver nel tramu de l'A-66 ente los enllaces de Llugones y Matalablima.