Strangis Guajes decide nun tocar nel Tsunami

La banda hardcore xixonesa y los catalanes La Élite son los dos grupos que dan esti pasu depués de la semeya de los responsables del certame col edil de VOX na sede del partíu.

"Strangis Guajes decidimos nun participar de tal festival, asina como de cualquier tipu d'eventu que tenga que pasar pel xugu d'un partíu fascista y retrógradu como ye VOX. Tamos convencíos de que non too val, y que les nueses idees y principios tán mui percima de cualesquier cosa", espresa'l grupu nun curtiu y concisu comunicáu en castellanu asoleyáu ayeri en redes sociales.

Los xixoneses, programaos pal primer día del festival, el xueves 27 d'esti mes, dan esti pasu "entovía siendo conscientes del perxuiciu que causaremos a la organización del Tsunami", y fai referencia a "los fechos asocedíos nes selmanes últimes nuesa ciudá de Xixón", en referencia al vetu de VOX dende la conceyalía de Festexos a los artistes qu'empleguen l'asturianu, "asina como n'otres tantes del país". La banda punk La Élite tamién anunciara ayeri la so decisión de nun acudir al festival que va tener llugar del 27 al 29 nel Parque Inglés (Hermanos Castro).