Los ataques a Galán pol señalamientu de dos diputaos anti-oficialidá, la noticia más vista del 2022 n'Asturies.com

Éstes son les diez informaciones que más interés xeneraron ente los nuesos llectores l'añu pasáu.

El final del 2021 y l'entamu del 2022 nun foi agradable pal escritor y periodista Inaciu Galán nin pa los trabayadores de Cuatro Gotes Producciones, empresa de la que ye alministrador. El señalamientu fechu por Ignacio Blanco y José María Figaredo, entrambos diputaos de VOX, contra la so persona y productora por ser favoratible a la oficialidá acabó con ataques como'l llanzamientu d'un güevu dende un edificiu y la puesta de pagamín na pesllera de la oficina asitiada nel xixonés barriu de L'Arena hasta en dos ocasiones.

Esta situación llevó a Galán a poner una denuncia na Policía y en facelo público, información qu'Asturies.com asoleyó'l 11 de febreru. Asina rellatábamos esta situación, información más vista nesti mediu dixital nel añu que finó recién.

La llista

Les noticies más lleíes esti 2022 incluyénse nesta llista y pueden consultase calcando sobre elles. Al empar deseamos un perbón 2023 a los nuesos llectores, añu nel qu'Asturies.com va siguir siendo fiel a la cita diaria cola información d'Asturies y del mundu.

1. Ataquen a Galán y a la empresa Cuatro Gotes tres del señalamientu de dos diputaos anti-oficialidá
2. Aína preséntase como “un glayíu” que pon “nel centru la necesidá de tresformar la realidá social y política del país”
3. Les Xornaes Elías García d'homenaxe al músicu y ornitólogu van celebrase del 16 al 18 de setiembre
4. La presión popular lleva a Agua de Cuevas a correxir un topónimu nuna publicidá
5. Aína naz pa reconstruyir dende abaxo un espaciu políticu “pensáu dende Asturies y p’Asturies” que fale “de tu a tu” con otres fuercies polítiques
6. Cuevas celebra’l Premiu ‘El Ojo Crítico’ de RNE como “un reconocimientu a toles persones que siguen falando a los sos fíos n’asturianu”
7. L’Hospital Begoña y la Clínica Asturias, denunciaes por nun tener númberos de contactu gratuitos
8. Los Berrones van tocar en Corvera nos festexos pol Día d’Asturies
9. ‘Les coses pol so nome’, campaña pa que se siga falando de “la xarda, el piescu, l’arbeyu y la pataca” al facer la compra
10. "L'asturianu, l'eonaviego y el castellanu son llingües oficiales d'Asturies"

Na semeya, cámara que Cuatro Gotes Producciones viose obligada a instalar en febreru pa torgar los ataques a la so oficina.