La entrada de VOX na conceyalía de Festexos de Xixón toca al Tsunami

11 Xunetu, 2023 por Pablo R. Guardado

Inicie sesión o rexístrese pa espublizar comentarios

Una semeya de los organizadores del Tsunami con Óliver Suárez Rubio na sede de VOX, partíu que va xestionar Festexos en Xixón, ta provocando reaiciones hacia'l festival. Mala Reputación, Desakato y Misiva asoleyaron un comunicáu conxuntu, los catalanes La Élite anunciaron la so decisión de nun participar y los dueños del Vendetta, que nun sirvieron al edil nel so llocal, deciden nun acudir como públicu.

Una publicación de VOX na so cuenta llocal d’Instagram nun tardó de tener repercusión en redes sociales na nueche del domingu. “Güei entamamos ronda d’axuntamientos”, principiaba’l testu acompañáu de la semeya de los protagonistes y los nomes de los responsables “de la empresa organizadora de festivales de música nel norte d’España, ente ellos Tsunami Xixón y Gijón Life”.

“Punximos en común necesidaes, árees de meyora y idees pa Xixón. De xuru que la primera de munches. Un placer”, finaba. Nun tardó’l Tsunami n’asoleyar, na mañana d'ayeri, un comunicáu nel qu’afirma tar, dende la so creación nel 2017, “totalmente a favor de la llibertá d’espresión y en contra de que s’utilice’l festival de forma partidista o eleutoral”.

“Asegurarémonos de que tolos artistes nacionales y internacionales que formen parte del festival siempre puedan espresase llibremente y comunicar lo que deseen nes sos lletres en castellano, asturianu, galego, euskara, català, inglés o na llingua que deseen”, sigue’l testu, nel qu’espliquen que pa la correuta realización del certame “ye totalmente necesario aconceyar con cargos eleutos de la ciudá, y con toles sos autoridaes públiques”. “Pa que n’Asturies se siga celebrando ún de los mayores y meyores festivales de punk rock del mundu”, añade.

Les reaiciones

Una de les primeres foi la de los grupos asturianos Misiva, Desakato y Mala Reputación, programaos na primer xornada del Tsunami, el xueves 27, qu’asoleyaron ayeri un comunicáu conxuntu en llingua asturiana col que “queremos facer alcordanza de lo que somos: antifascistes, favoratibles de la diversidá llingüística, de la oficialidá del asturianu, de la diversidá de xéneru, de la llucha por una sociedá feminista na que se respeten los drechos de les persones LGTBI”, entama una llarga declaración de principios.

Confiesen que se plantegaron nun tocar en Xixón “poles declaraciones que la conceyalía de Festexos, xestionada pol partíu VOX, fizo escontra les manifestaciones ideolóxiques nos escenarios” y alvierten “que nun vamos permitir que consigan callanos”. “Creéis que podéis zarrar la puerta, pero nun tenéis la llave, y nun vais ser quien a parar esti furacán cultural. La cultura tamién ye política, y naide nun va controlar lo que sí o non se puede dicir, representar o cantar. Escontra’l fascismu, ¡nin un pasu atrás”, fina’l testu.

Avanzada esta tarde llegaría la primer baxa del Tsunami, La Élite. La banda catalana de synthetik punk anunciaba que “La Élite nunca participará onde’l fascismu intente poner la so solombra. Puxa la llibertá!!!” depués d’afirmar que “entendemos que ye necesariu l’aconceyamientu, pero que se faiga na Casa Conceyu y ensin la posterior difusión en redes, yá que ye humildante pa los artistes que participamos nésti”.

Tamién dieron la so opinión los responsables del Vendetta, chigre del xixonés barriu d’El Carme qu’ocupara titulares el mes pasáu al dexar de servir a Suárez Rubio al conocer el so cargu pa “ser fieles a los nuesos principios”. Naquellos díes de polémica, mensaxes a favor y en contra, acudieron al Resurrection Fest en Viveiro, qu’entama la mesma empresa que’l Tsunami, pero agora anunciaron la so decisión de nun dir a la ctia xixonesa.

“Como dalgunxs de vosotrxs sabéis, llevábamos meses esperando pa dir al Tsunami Xixón Festival, al igual que l’añu pasáu. Yera una cita ineludible, pero daos los recientes acontecimientos, decidimos faltar a la cita. Nun foi una decisión tomada a lo xole”, apuntaron en redes sociales.

Na semeya, l'escenariu principal de la pasada edición del Tsunami mientres el conciertu de The Baboon Show.