El poemariu ‘Tayu’, de Fernández-Osorio, obra merecedora del XXVI Premiu Xuan María Acebal

|
Alejandro Fernández-Osorio

Alejandro Fernández-Osorio lleva’l so primer Xuan María Acebal de poesía cola obra ‘Tayu’, el so segundu poemariu n'asturianu tres 'Magaya'. Trátase del segundu de los cinco Premios Lliterarios que falla la Conseyería de Cultura, Política Llingüística y Turismu.

L’acta del xuráu destaca “cómo la voz del nietu revisita les vivencies de la mina con una visión social y política, pero al empar íntima y novedosa, de quien se siente heriede d’una tradición que pesa nel entornu familiar, pero qu’en realidá yá nun existe pa quien escribe dende otra esperiencia, la de la emigración”. Ésti tuvo compuestu poles poetes Raquel F. Menéndez, Esther Prieto y Alba González Sanz, l’especialista en Llingua Asturiana Adrián Martínez Expósito, y el tamién poeta y ganador del Xuan María Acebal del añu pasáu con ‘El llar n’orde’, Gonzalo González Barreñada, amás d’Antón García, direutor xeneral de Política Llingüística, como presidente, y Xosé Miguel Suárez Fernández ‘Tapia’, filólogu de la direición xeneral, como secretariu.

L’autor nacíu en Viḷḷayana nel 1984 y residente en Madrid ye autor de los poemarios ‘Frontería’ (2011) y ‘Magaya’ (2014), que sería la so primer creación en llingua asturiana, reconocida nos XV Premios de la Crítica d’Asturies na so modalidá de poesía. L’escritor y psicológu tamién tien escrita una novela, ‘JC’ (2006), y collabora en espublizaciones culturales como ‘Clarín’, ‘Cuaderno de lluvia’, ‘Koult’, ‘El cuaderno’ y ‘Oculta lit’.

El Máximo Fuertes Acevedo, el próximu

El Xuan María Acebal ye’l segundu de los Premios Lliterarios que se conoz. El primeru foi’l XII Premiu Alfonso Iglesias de cómic, que ganó Alberto Vázquez García gracies al so trabayu ‘El sol na escombrera’.

El próximu en fallase va ser el XXVI Máximo Fuertes Acevedo d'ensayu, con reunión del xuráu convocada pal 7 d’ochobre. Los Premios Lliterarios tienen toos una recompensa de 5.000 euros.

Contador Estadistiques