Gonzalo G. Barreñada lleva’l Xuan María Acebal con ‘El llar n’orde’
- ‘Allumamientu’, de Texón, lleva’l XXIV Premiu Xuan María Acebal de poesía
- Barreñada presenta 'El pesu de la lluz' n'Uviéu
- “La idea del poemariu ye poner n’orde la historia personal, les idees y les llectures”, adelanta Barreñada
- El poemariu ‘Tayu’, de Fernández-Osorio, obra merecedora del XXVI Premiu Xuan María Acebal
- El ciclu Autores nel Camín arranca en Corvera cola presencia de Gonzalo G. Barreñada
- Gonzalo G. Barreñada recibe tamién el XXI Premiu de la Crítica de poesía con ‘El llar n’orde’
|
14 Payares, 2019 por Pablo R. Guardado
- Inicie sesión o rexístrese pa espublizar comentarios
El XXV Premiu Xuan María Acebal de poesía ye pa Gonzalo González Barreñada pola obra ‘El llar n’orde’ del autor de Sotrondio. Mentes, el Premiu María Xosefa Canellada de lliteratura infantil y xuvenil queda ermu per primer vegada nes sos doce ediciones.
El direutor de Política Llingüística, Antón García presidió'l xuráu na tarde d'ayeri. Tuvo compuestu polos escritores Pablo Texón –ganador del añu pasáu con ‘Allumamientu’–, Marta Mori y Laura Marcos, que decidieron premiar a ‘El llar n’orde’ ente les nueves obres presentaes por “la singularidá de la voz poética que recrea con emoción el paisax natural y humanu n’Asturies con una llingua qu’esplora les posibilidaes del versu llargo averándose a la prosa”.
Tres abrir la plica, l’autor resultó ser González Barreñada, que se presentó baxo l’alcuñu ‘M. R. Beyle’. Llicenciáu en Xeografía y Historia, el poeta y narrador en llingua asturiana nacíu nel 1973 na cuenca’l Nalón recueye la so obra na revista ‘Campo de los Patos’ y nos llibros ‘Biografíes’, ‘La casa de Xuan Buelga’, ‘Hestories de Burgundu’ y 'El pesu de la lluz', espublizada esti añu mesmu añu por Saltadera.
La recompensa d’esti premiu ye de 5.000 euros, tres vivir esti añu un aumentu de 2.000 euros con respeuto a convocatories anteriores de los Premios Lliterarios qu’entrega la Conseyería de Cultura, Política Llingüística y Turismu. Una vegada conocíu’l fallu d’esti gallardón queda pendiente de saber l’escritor merecedor del XL Xosefa Xovellanos de novela, yá que’l XII María Xosefa Canellada de lliteratura infantil y xuvenil quedó ermu al considerar el xuráu, aconceyáu na tarde del martes, “que nenguna de les obres presentaes axunta nel so conxuntu la calidá lliteraria y llingüística necesaria para llograr el galardón”.
No que respeuta al restu de gallardondes, esti 2019 Ruma Barbero lleva’l XI Alfonso Iglesias de cómic por 'Seltegu' y José Ángel Gayol el XXV Premiu Máximo Fuertes Acevedo d’ensayu por ‘El silenciu invisible’.
Na semeya, Barreñada firma un exemplar del llibru 'El pesu de la lluz' nel puestu d'Iniciativa pol Asturianu na FIDMA.
Efrén d'Andrés
Lo + visto de la selmana
