Texón repite 3 años depués como ganador del Premiu Xuan María Acebal de poesía

|
Pablo Texón

Si nel 2018 la so obra ‘Allumamientu’ merecía’l XXIV Premiu Xuan María Acebal de poesía, nesta edición de los Premios Lliterarios Pablo Texón repite como ganador d'esti gallardón con ‘Cantar de ti mesma’. L’autor de Felechosa confírmase asina como ún de los poetes de referencia de la lliteratura asturiana d’anguaño.

El xuráu, formáu por Marina Pangua, Esther Prieto, Alba González Sanz, Rodrigo Olay y Alejandro Fernández-Osorio García –que llevó l’añu pasáu’l premiu con ‘Tayu’–, y presidíu por Antón García, direutor xeneral de Política Llingüística, decidióse por esti poemariu ente tolos presentaos pola “intencionalidá de cantu que tien el llibru al romper colos esteriotipos de les elexíes y los cantos de duelu. La voz de celebración que lu percuerre atrévese a combinar diferentes opciones formales en poemes a lo llargo del testu: de versu llibre a cuartetes, de coros a coples o haikus, ensin perder frescura, regularidá nin impactu, pues ye bien conocedor de les formes que manexa y qué temátiques concretes son les que reclamen eses formes”.

Al abrir la plica, presentada como W. W., el so autor resultó ser Texón, que va recibir una recompensa de 6.000 euros. Profesor de Lengua Castellana y Literatura, de Lliteratura Universal y de Llingua Asturiana, y académicu correspondiente de la Academia de la Llingua Asturiana, punxera el so nome enantes na llista de ganadores de premios de gran importancia, como’l Nené Losada Rico y el Teodoro Cuesta.

Segundu en fallase

El Xuan María Acebal ye’l segundu de los Premios Lliterarios 2021 que se falla. Primeru diose a conocer qu’Ángel de la Calle, con ‘El sol na escombrera’, llevaba’l XIII Premiu Alfonso Iglesias de cómic.

Queden pendiente de decidise’l XIV Premiu María Josefa Canellada de lliteratura infantil y xuvenil, el XXVII Premiu Máximo Fuertes Acevedo d'ensayu y el XLII Premiu Xosefa Xovellanos de novela. Mentes, como novedá, nos meses próximos van convocase dos gallardones nuevos que completen los Premios Lliterarios de la Conseyería de Cultura, Política Llingüística y Turismu: el I Premiu Florina Alías a la meyor traducción al asturianu y el I Premiu Enriqueta González Rubín de narrativa moza.

Na semeya, Texón na entrega de los Premios Lliterarios 2018 celebráu nel Paraninfu del Edificiu Históricu de la Universidá d'Uviéu.

Contador Estadistiques