Día del Llibru Asturianu

Política Llingüística anuncia’l calendariu de los xuraos de los Premios Lliterarios 2020

|
Premios Lliterarios 2020

La Conseyería de Cultura, Política Llingüística y Turismu comunicó per primer vegada'l calendariu d’aconceyamientu de los xuraos de los Premios Lliterarios 2020. El primer fallu de les cinco estayes de los gallardones va tener llugar esti martes y va corresponder, como ye vezu, al más nuevu, l'Alfonso Iglesias de cómic.

Antón García, direutor xeneral de Política Llingüística, va presidir ésti y tolos xuraos. A les 17.30 hores va vese na sede del so departamentu cola escritora Mariluz Pontón, la profesora Tamara Collar, la dibuxante Raquel Llagartos, la historiadora d’arte Mercedes Menéndez y Ruma Barbero, ganador de la edición del añu pasáu con ‘Seltegu’, pa decidir el merecedor de la presente, la decimosegunda.

El siguiente premiu que se va fallar ye’l Xuan María Acebal de poesía, el día 23, pa siguir n’ochobre col Máximo Fuertes Acevedo d'ensayu y el María Xosefa Canellada de lliteratura infantil y xuvenil, el 7 y el 21, de manera respeutiva. El xuráu del más veteranu, el Xosefa Xovellanos de novela, ta convocáu pal 11 de payeres.

Los Premios Lliterarios tienen toos una recompensa de 5.000 euros. A ellos hai que sumar el Premiu y Festival Nel Amaro de Teatru Profesional en Llingua Asturiana o Gallego-asturiano, valoráu en 6.000 euros, qu’esti añu vive la so cuarta edición y que s’entrega tamién na gala d’estos gallardones.

Contador Estadistiques