Fernández-Osorio fai una presentación doble de 'Tayu' n'Uviéu y Xixón

Trabe edita esti llibru, que mereció nel 2020 el XXVI Premiu Xuan María Acebal de poesía.

Alejandro Fernández-Osorio va tar estos díes n'Asturies pa dar a conocer el poemariu 'Tayu'. La primer cita va ser esta tarde, dientro del ciclu d'actividaes sobre llingua y cultura asturiana Uviéu Abierto, qu'entama la Conseyería de Cultura, Política Llingüística y Turismu na Biblioteca d'Asturies Ramón Pérez de Ayala, y va consistir n'actu diferente a les habituales presentaciones.

"Vamos poner n'escena dalgo no que vengo trabayando munchu tiempu, que ye'l monólogu reflexivu y artísticu nel que van fusionase delles artes pa xenerar una isla de pensamientu ente'l públicu y yo", anunció l'autor. Una propuesta novedosa que va principiar a les 19 hores.

Alderique con Bande

Mañana'l de Viḷḷayana va acudir a Xixón pa dar a conocer el llibru nel Atenéu Obreru de Xixón. Va ser tamién a les 19 hores y nesta ocasión va tar acompañáu pol cineasta Ramón Lluís Bande, col que va tener un alderique.

El xuráu del Xuan María Acebal rescampló de 'Tayu' "cómo la voz del nietu revisita les vivencies de la mina con una visión social y política, pero al empar íntima y novedosa, de quien se siente heriede d’una tradición que pesa nel entornu familiar, pero qu’en realidá yá nun existe pa quien escribe dende otra esperiencia, la de la emigración". "Pensáu como la siguiente posa nuna obra sele y firme que busca remirar l’Asturies na que se cría, compónse a camín ente la poesía y l’ensayu. Nesti casu detenémonos na mina como casa y mitu familiar; nel tayu (y la so polisemia) como llugar d’orixe", espliquen dende la editorial.