“El Plan de Normalización treslladará y ampliará la visibilización, promoción y usu del asturianu nel sector públicu”, diz Gutiérrez

Ensin concretar plazos porque “queremos que sía de consensu”, pero cola intención de facelo “cuanto antes porque realmente consideramos que ye importante y urxente”, la Viceconseyería de Cultura, Política y Deporte va presentar un Plan de Normalización Llingüística esta llexislatura. Ana Vanesa Gutiérrez apuntó que’l trámite va ser paralelu al d’actualización y desendolcu de la Llei d’Usu y Promoción.

Los dos partíos que conformen el Grupu Mestu, Foro y Podemos, que compartieron el tiempu d’intervención na Comisión de Presidencia, Retu Demográficu, Igualdá y Turismu de la Xunta Xeneral, interesáronse pola normalización llingüística nos sos turnos d'entrugues –los únicos, yá que Convocatoria por Asturies y la FSA, nel Gobiernu, nun fixeron usu del so turnu–. El diputáu del partíu asturianu, Adrián Pumares, qu’emplegó la llingua asturiana, entrugó en concretu “polos puntos que va tener esi desarrollu, esa modificación, de la Llei de Promoción del Asturianu; sobre qué se va basar”.

Gutiérrez apuntó al respeuto que la norma, del añu 98, “foi un avance mui importante nel desarrollu del Estatutu d’Autonomía, que prevía qu’una llei diere desarrollu a los artículos qu’indicaben la protección del asturianu”, pero añadió que “yá pasaron munchos años y ye una demanda la so actualización y el so desarrollu, y pa ello queremos trabayar dende’l consensu recibiendo toles aportaciones necesaries”. Nesi sen, dixo que dende la Subdireición de Política Llingüística “queremos recomendar l’estudiu y análisis de les necesidaes que presente esta llei, pero tamién en cuanto a los actores y entidaes interesaes, les instituciones consultives qu’apaecen na propia llei como son l’Academia de la Llingua, el RIDEA o la Universidá d’Uviéu, a los que se-yos treslladará y se-yos pidirá informes al respecto, y dende esta Xunta Xeneral, asina como del Conseyu Asesor de Política Llingüística”.

Pela so parte la vocera de Podemos, Cova Tomé, qu’aseguró que “la falta d’oficialidá merma derechos a los habitantes”, centróse nel Plan de Normalización Llingüística y los sos plazos. “Coincido con usté en que la falta d’oficialidá merma los derechos y nun garantiza los derechos llingüísticos de los asturianos y asturianes, y que tenemos qu’actualizar el desarrollu del Estatutu d’Autonomía en mandatu de la Constitución y de la Carta Europea de les Llingües Minoritaries”, entamó la so respuesta Gutiérrez, qu’añadió que “tenemos qu’actualizar y desarrollar esa Llei d’Usu que tenemos en vigor dende 1998”.

Rescampló que “la tramitación y ellaboración d’una llei lleva un procesu qu’a veces demórase más de lo deseable, y por eso en paralelo a esa propuesta d’adaptación de la Llei d’Usu queremos desarrollar la vixente en tolo que se pueda y una d’eses midíes principales ye ellaborar, presentar un Plan de Normalización que vendrá tamién esta Cámara a recibir eses aportaciones y la so aprobación, y que treslladará y ampliará la visibilización, promoción y usu del asturianu nel sector públicu asturianu”. Nesti puntu recordó que l’únicu aprobáu pol Gobiernu foi’l del 2005, pal periodu 2005-2007, “pero a partir d’ehí nun se tornó a facer a pesar de que se treslladara esa demanda, esa necesidá, de siguir implementando eses midíes”.

Estos planes de normalización “permiten facer un siguimientu, non solamente establecer les midíes que se deben llevar a cabu, sinón esa secuenciación de qué departamentos deben faceles y qué recursos se pueden necesitar”. Y “dao’l tiempu que pasó ente’l Plan del 2005 a la situación actual, y que tien qu’atender a la realidá d’esti momentu, a la estructura del sector públicu actual, tenemos qu’analizar los departamentos y les acciones que deberíen facese nesi sentíu y qué podemos aprovechar de les nueves tecnoloxíes pa qu’esa normalización del asturianu nel sector públicu sea eficaz y sea eficiente”.

“La preparación d’esti Plan de Normalización contamos con poder facela cuanto antes, porque realmente consideramos que ye importante y urxente. Permíteme que nun-y dea plazos, porque queremos que sea, tien que ser, un plan de consensu, un plan que reciba toles aportaciones non solamente de les instituciones asesores de l’Alministración pola Llei d’Usu, tamién del Conseyu Asesor de Política Llingüística puestu en marcha na anterior llexislatura y el conxuntu de la ciudadanía, porque sin duda tien una repercusión importante y queremos que sea un plan que nos ayude realemente a que sean efectives eses midíes de normalización llingüística”, finó.

Axencia Asturiana d'Industries Culturales

Tomé entrugara tamién a la viceconseyera pol compromisu eleutoral socialista de creación d’una Axencia Asturiana d’Industries Culturales. “Ye una demanda histórica de los sectores, la esistencia d’una axencia como entidá que xestione d’una manera más eficiente y dirixida a la realidá del sector cultural tola política d’ayudes que pueda haber, d’asesoramientu y internacionalización”, apuntó Gutiérrez, qu’esplicó que la so constitución “debería ser por llei y por eso traeremos una propuesta de llei a esta Cámara pa poder trabayar sobre ésta”.