"Creemos que lo que quieren facer ye intentar imponer una cooficialidá de facto", asegura Cuervas-Mons

El diputáu uvieín del Partido Popular (PP) considera que la estructura de Cultura "da un esclusivu pesu a la materia llingüística".

José Agustín Cuervas-Mons tocó'l tema llingüísticu na so fixación de posiciones de la sesión de la Comisión de Presidencia, Retu Demográficu, Igualdá y Turismu de la Xunta Xeneral pa presentar l'aición de gobiernu por parte de la vicepresidenta y conseyera Gimena Llamedo. "Yo voi falar claro. Creemos que vustedes lo que quieren facer nesta llexislatura ye intentar imponer una cooficialidá de factu, pela puerta d'atrás, y esta estructura pue responder a esta intención", espresó.

Enantes apuntara que dichu pesu dau a la materia llingüística llega "en perxuiciu a otres materies, multiplicando puestos innecesariamente". "Pienso que'l pautu cola izquierda radical, con Izquierda Xunida, colos comunistes, llastró, marcó, esta estructura de Gobiernu", apuntó depués de recordar, dirixéndose a Llamedo, que "nosotros-yos fiximos una ufierta sincera al entamu de la llexislatura de poder pautar lo que vusté llama temes d'Estáu".