Tomé va entrugar a Gutiérrez pola presencia del idioma en RTPA y polos servicios de normalización

Tamién va treslladar a la viceconseyera una pregunta pola ausencia d'una partida nel proyeutu de Presupuestos pa l'Axencia Asturiana de les Industries Culturales.

Mañana van tener llugar les dos sesiones últimes de la Comisión de Facienda y Fondos Europeos na que los representantes de les diferentes conseyeríes presenten les cuentes de los sos departamentos nel proyeutu de llei de Presupuestos Xenerales pal 2024. A les 9.30 hores va ser el turnu de la de Presidencia, Retu Demográficu, Igualdá y Turismu, de la que depende Cultura, Política Llingüística y Deporte.

La diputada de Podemos, Cova Tomé, va aprovechar el so turnu d'intervención pa treslladar trés entrugues a la viceconseyera Ana Vanessa Gutiérrez. La primera céntrase nos 100.000 euros que tornen a destinase a la RTPA pa "la promoción del asturiano y el gallego-asturiano", "una cantidá puramente simbólica dau'l costu d'una producción audiovisual medianamente profesional", polo que va preguntar "qué otres midíes tienen previsto tomar pa que les llingües propies d'Asturies tengan una presencia digna nos medios de comunicación públicos".

Tamién va interesase la valdesana poles partíes que reciben los diferentes servicios de normalización, un total de 15. "D'ellos hai cuatro qu'anguaño nun funcionen: Castrillón, Llanera, Nalón y Cabrales. Un desaxuste que ye necesario solventar, bien con la desapaición d'eses partíes o bien col compromisu espresu de los conceyos afeutaos de poner en marcha efeutivamente esos servicios".

Sobre les cuantíes económiques que reciben, ente los 18.400 y los 21.840 euros, dependiendo de si se destinen a servicios d'un solu conceyu o a una mancomunidá", apunta Podemos que son "cantidaes inferiores a les concedíes por exemplu va diez años. Por último, rescampla que nes cuentes previstes nun se reseña partida pa la puesta en marcha de la Rede de Normalización, "una medida reiteradamente solicitada por la Asociación de Trabayadores de la Normalización Llingüística", polo que Tomé va entrugar a Gutiérrez pola "intención real de poner en funcionamientu esti organismu más allá de l'aprobación del decretu de creación".

Un compromisu programáticu del PSOE

La tercer pregunta céntrase na Axencia Asturiana de les Industries Culturales y Creatives, "una reivindicación histórica del sector que nun se ve reflexada nel proyeutu de Presupuestos, yá que nun consta partida nenguna sobre ello", yá qu'esti organismu "sería l'encargáu de formular y desendolcar la política cultural, entendida como focu de creación de emplegu, favorecedor de la profesionalización y la formación amás de la promoción de les empreses culturales y creatives asturianes y de los sos productos y servicios". "¿Ensin una partida presupuestaria específica cómo piensen implementar el so compromisu programáticu de creación d'esta axencia y con qué calendariu?", va ser la entruga concreta.

Na imaxe, Tomé. Semeya obra d'Alisa Guerrero.