“Vamos siguir trabayando nel desendolcu y adaptación de la Llei d’Usu y Promoción”, apunta Llamedo

La normalización llingüística ocupó menos d’un minutu de la comparecencia de Gimena Llamedo na Comisión de Presidencia, Retu Demográficu, Igualdá y Turismu de la Xunta Xeneral pa dar a conocer el so programa de gobiernu. “Vamos siguir trabayando nel desendolcu y adaptación de la Llei d’Usu y Promoción”, rescampló la vicepresidenta, qu’espresó’l compromisu del Executivu pa cola oficialidá, “una demanda que consideramos irrenunciable”.

En total dedicó 37 segundos d’una intervención de media hora de llargor na que tocó numberosos aspeutos venceyaos cola despoblación y el retu demográficu, la modernización de la l’Alministración autonómica, igualdá, polítiques turístiques, emigración, cultura, patrimoniu y deporte. “Conocen la opinión d’esti Gobiernu acerca del reconocimientu d’oficialidá que deberíen tener les nueses llingües, una demanda que consideramos irrenunciable y pa la que se necesita l’apoyu d’una mayoría cualificada d’esta Cámara. Nesti sentíu nun podemos menos que-yos encamentar a la busca de consensu que permita protexer y tresmitir un patrimoniu tan valiosu como son l’asturianu y l’eonaviego”, principió la vicepresidente.

“Pa ello van tener la nuesa disposición absoluta”, siguió la vicepresidenta, “al tiempu que vamos siguir trabayando nel desendolcu y adaptación p’afondar na normalización y promoción social del asturianu”. Llamedo emplegó en tou momentu’l castellanu, mentes que la viceconseyera de Cultura, Política Llingüística y Deporte, Ana Vanessa Gutiérrez, ta usando l’asturianu nes intervenciones d’una comisión que ta nesti momentu nel tramu d’intervenciones de los diferentes grupos parllamentarios pa interpelar a la conseyera y al so equipu.

El retu demográficu, “un asuntu d’Estáu p’Asturies”

Ente los munchos temes tocaos por Llamedo al tratase la so conseyería d’un departamentu con gran cantidá de competencies, la vicepresidenta dio una importancia especial al retu demográficu, “un asuntu d’Estáu p’Asturies”. Anunció que’l Gobiernu va aprobar n’ochobre’l proyeutu de Llei d’Impulsu Demográficu depués de la paralización del trámite a pidimientu del PP pa recibir aportes de tolos grupos parllamentarios, la creación del Plan Retorna pa facilitar el regresu de persones emigrantes, el caltenimientu de la fiscalidá diferenciada pal mediu rural, la reducción a cero de los impuestos nesta zona y la consolidación de les ayudes direutes a les families.

No que respeuta a la emigración, apuntó l’ampliación al doble de les places de la Escuela d’Asturianía y la creación del programa ‘Origen’ pa facilitar a descendientes d’emigrantes el conocer la tierra de los sos familiares. Tamién la constitución del ‘Observatorio de la Emigración Asturiana’, de la mano de l’asociación Compromiso Asturias XXI.

La modernización de l’arquiteutura institucional p’adaptala a los nuevos tiempos y afianzar una Alministración “áxil, eficaz y eficiente” ye otra de les metes de la Vicepresidencia, xunto cola potenciación de les polítiques d’igualdá y l’oxetivu de contar con un turismu sostenible y responsable. No que respeuta a la estaya de cultura, patrimoniu y deporte apuntó la consolidación y ampliación del circuitu ‘Asturies, Cultura en Rede’, la creación de la Rede de Teatros d’Asturies y de l’Axencia d’Industries Culturales, el diseñu del Portal de Cultura d’Asturies, la culminación de l’ampliación del Muséu de Belles Artes, la renovación de parte de la coleición permanente del Arqueolóxicu, la espublización d’un protocolu pa la prevención y deteición del acosu sexual al que va siguir otru d’actuación énte los casos d’acosu a menores nel ámbitu deportivu o l’ampliación financiación a federaciones y clubes, ente otros.