Vanessa Gutiérrez: una promesa y un compromisu de la conseyera de Política Llingüística

Esti domingu tomaron posesión como conseyeres l’hasta agora viceconseyera Ana Vanessa Gutiérrez, al frente de Cultura, Política Llingüística y Deporte, y Marta del Arco, de Derechos Sociales y Bienestar. La escritora llanzó una promesa, y un compromisu no que respeuta al asturianu, en declaraciones depués del eventu.

Nun foi nuna intervención oficial, yá que sólo tomó la pallabra nel actu’l presidente Adrián Barbón, presente nel actu celebráu nel patiu de columnes del Palaciu de los Condes de Toreno, pero sí a entrugues de los medios de comunicación. Allegróse Gutiérrez del cambiu de rangu del so departamentu al pasar a ser conseyería y prometió escuchar “a los sectores, d’atender les sos necesidaes y facer tolo posible pa qu’ameyoren de manera oxetiva les sos condiciones”.

D’igual forma, comprometióse a impulsar “el Plan de Normalización de les llingües propies d’Asturies”, que l’agora conseyera consideraba “importante y urxente” nel mes de setiembre na Comisión de Presidencia, Retu Demográficu, Igualdá y Turismu de la Xunta Xeneral, y de modificar “la Llei d’Usu”, cuestión incluyida, al igual que dichu plan, nel alcuerdu de Gobiernu ente FSA y Convocatoria por Asturies. Pela so parte, Barbón encamentó a Gutiérrez y del Arco a trabayar pa “liderar la década del cambiu y construyir esta causa común y esta casa común que ye Asturies”.

Nel ámbitu de la cultura y el deporte, defendió l’aplicación de polítiques tresformadores “que lleguen a toes partes” cola fin de fortalecer el patrimoniu asturianu "o asturianista de la nuesa tierra, esi patrimoniu que forma parte de la nuesa forma de ser, de la tradición y de la herencia bien recibida”. “Escuchái siempre a la sociedá y a la cai y deprendéi d’elles”, recomendó a Gutiérrez y Del Arco'l presidente, que pa finar lleó unos versos n'asturianu de Berta Piñán, na llexislatura pasada conseyera de Cultura, Política Llingüística y Turismu.