Areces diz qu'hai "razones fundaes" pal cese d'El Ferreiro

El presidente del Principáu dixo qu'hai razones fundaes pal cese de Pepe El Ferreiro, como direutor del Muséu Etnográficu de Grandas de Salime. Amás, aseguró que la decisión que sólo tien un oxetivu, "meyorar la xestión y los beneficios pa los ciudadanos en tol exe del Navia".

El presidente del Gobiernu asturianu indicó, en declaraciones a los medios na so visita a Navia, qu'hai una serie d'infraestructures culturales nel occidente que ye necesario veles integraes.
  
"Ési ye un tema como tantos otros qu'asoceden, onde una persona salió elixida llibremente al traviés d'un contratu d'alta direición, pero al xuiciu del consorciu y les entidaes que lu formen, hai qu'analizar un modelu de xestión diferente y esta tarde creo que van aconceyar y esplicar cuáles son eses razones", dixo Areces.
  
Nesti sen, Álvarez Areces afirmó que'l Muséu de Grandas de Salime nun ye sólo un equipamientu aisláu, sinón qu'hai que saber trabayar y potenciar tou un proyectu nel que tamién el Gobiernu llevan invertíu munchu tiempu y munchos recorsos. "Eso ye lo que se piensa dende la perspectiva del Consorciu y dientro de la llexitimidá que tien el Consorciu pa nomar y cesar llibremente. Eso ye lo que me treslladaron pero, sicasí, güei'l Consorciu va aconceyar y va dar más información sobre ello", dixo Álvarez Areces.  
 
Malestar n'IU
  
D'otra parte, el parlamentariu d'Izquierda Unida-Bloque por Asturies-Verdes mostró'l so malestar pol anunciáu cese del direutor del Muséu Etnográficu de Grandas de Salime, "el meyor muséu etnográficu d'Asturies y ún de los meyores del norte d'España", señaló. Definió a 'El Ferreiro', como'l "autor" d'esti muséu, y "una persona reconocida nel occidente d'Asturies".
  
"Nun entendemos que de manera apresurada se convoque'l so cese", señaló, pa pidir que se caltenga'l so puestu porque "fai xusticia al trabayu d'esta persona". Según Iglesias, "nun se plantegó nengún argumentu seriu que xustifique esta decisión". Esclaró qu'esti posicionamientu del so grupu "nun se trata d'una reaición corporativa, sinón de plantegar una posición política fundamentada", señaló en rellación a la vinculación d'El Ferreiro con Izquierda Xunida nel occidente asturianu.