La Xunta Xeneral pide la restitución de Pepe El Ferreiro

La Xunta Xeneral aprobó, colos votos de PP y IU-BA-Verdes, una proposición non de llei que pide que'l Gobiernu reponga "de forma inmediata" a  Pepe El Ferreiro.

El diputáu del PP, Alfonso Román López, foi l'encargáu de defender la iniciativa. Señaló que la colección del Muséu ye "única" y "singular", frutu del trabayu de Pepe El Ferreiro. "¿Qué pasaría si a alguién se-y ocurriere cesar a la Baronesa Thyssen?", preguntóse pa poner en dulda la decisión de cesar a El Ferreiro. Criticó a la conseyera de Cultura del Principáu d'Asturies, Mercedes Álvarez, y señaló que-y "falta una fornada". Amás dixo que les razones daes pola dirixente rexonal pal cese nun son creíbles.
  
Según consta na esposición de motivos, la decisión de cesar como direutor del Muséu Etnográficu a Pepe El Ferreiro supunxo un actu "d'absoluta inxusticia" y "de despropósitu no institucional". Resalta amás que 'Pepe'l Ferreiro' creó "de la nada" el meyor Muséu Etnográficu d'Asturies y ún de los más reconocíos tanto n'España como internacionalmente.
  
El PP defendió que la obra de 'El Ferreiro' supunxo una "revolución" no cultural y tornó nel "motor económicu" del conceyu y de la comarca. "Nenguna de les razones daes xustifica'l so cese".
  
El diputáu d'IU-BA-Verdes, Roberto Colunga, llamentó que dende'l Principáu s'intentare "desprestixar" la figura de Pepe El Ferreiro atribuyéndo-y irregularidaes na xestión. Consideró necesario que se reconozan los "méritos" d'El Ferreiro.
  
Pela so parte, el diputáu del PSOE, Alfonso Rey, señaló qu'esti asuntu yá se trató na Comisión de Cultura de la XXPA y que'l PSOE siempre apostó "de forma decidida "polos equipamientos". Esplicó que'l Muséu nun ye d'El Ferreiro, sinón de tolos asturianos, porque siempre se-y destinó recursos. Calcó en qu'esistieron "irregularidaes alministratives" na xestión de 'El Ferreiro' al frente del muséu. "Los cargos de llibre designación nun puen facer lo que-yos pete", dixo Alfonso Rey.
  
Argumentó que'El Ferreiro taba hasta construyendo una vivienda "ensin nengún tipu d'autorización". Añadió que rompió relaciones cola Universidá, y qu'abrió una cuenta bancaria nuna entidá distinta de Caxastur, a pesar de que ye esta la que ta presente nel Consorciu que decidió quién xestiona'l Muséu.