Declaráu improcedente'l despidu de Pepe El Ferreiro

El xulgáu de lo Social Númberu 2 d'Avilés considera "improcedente" el despidu del ex direutor del Muséu de Grandas de Salime, José María Naveiras Escanlar, 'El Ferreiro'.

Asina consta na sentencia a la que tuvo accesu Europa Press, qu'ordena la realmisión de Pepe El Ferreiro o l'abonu de les indemnizaciones previstes, que nesti casu sería un xornal d'un añu, 25.529,28 euros.
  
D'esta forma, el xuez estimó la demanda formulada por El Ferreiro, representáu pol abogáu Pelayo Mijares. El fallu señala que contra la sentencia pue interponese recursu de suplicación ante'l Tribunal Superior de Xusticia (TSXA)
   
Según consta na sentencia como fechu probáu, foi'l día 26 de xineru cuando El Ferreiro recibió la comunicación escrita de la presidenta del Consorciu, la conseyera de Cultura, Mercedes Álvarez. El Ferreiro, que llevaba trabayando como direutor del muséu dende 1989, decidió recurrir la decisión del so despidu. Pidía la nulidá del mesmu, y subsidiariamente la declaración de despidu improcedente.
  
El xuez nun declara'l despidu nulu, puesto que la regulación llegal actual namás se contempla la nulidá p'aquellos despidos disciplinarios que tengan como móvil alguna de les causes de discriminación previstes na Constitución y na Llei o se produzan con violación de los derechos fundamentales y llibertaes públiques del trabayador. Sostién la sentencia qu'anque la demanda alude a causes del despidu "inconfesables", "de carácter políticu", lo cierto ye que del exame de les actuaciones nun pue establecese dicha circunstancia. Esto ye, anque reconoz que la causa ye difícil de probar, requeríase acreditala al traviés de cualquier mediu de prueba almitíu en derechu.
  
Lo que sí afirma la sentencia ye que'l despidu d'El Ferreiro ye improcedente. Básase en que, n'analizando la documentación apurrida peles partes, "nun puen deducise con nitidez los incumplimientos alegaos na comunicación de desistimientu unillateral del empresariu". El xuez nun ve causa con potencialidá bastante pa calificar como procedente'l despidu.
 
Na so argumentación, el xuez esplica qu'a lo llargo del "dilatáu periodu temporal", el Consorciu conocía "más que sobradamente" el métodu de trabayu d'El Ferreiro. "Igual non mui ortodoxu", almite la sentencia. Sicasí, señala que lo cierto ye que nun hai nenguna circunstancia nueva (grave y culpable) que permita considerar alteriáu la relación contractual, "dientro d'unes coordenaes d'actuación del actor, conocíes y consentíes pola entidá demandada, dientro del marcu de la bona fe y l'enfotu mutuu que mandaba la relación llaboral".
  
Como prueba d'ello, el xuez señala que la "bayurosa prueba documental apurrida pela parte demandada evidencia precisamente un estilu de dirección", en llinia más o menos uniforme, mientres tol periodu de la relación llaboral, "perfectamente conocida pola demandada".
 
La Conseyería de Cultura declárase “satisfecha” cola sentencia
El Bloque esixe la realmisión