Cultura crea una llinia de subvención a asociaciones pa la normalización del asturianu con una dotación de 50.000 euros

|
Berta Piñán Comisión de Facienda presupuestos 2023

Berta Piñán, conseyera de Cultura, Política Llingüística y Turismu, compareció esti xueves na Comisión de Facienda pa esponer el proyeutu del so departamentu pa los Presupuestos del 2023. Confirmó que la partida de 50.000 euros pa la ‘Normalización del asturianu’ va destinase a asociaciones y rescampla l’esfuerciu económicu pa disponer del traductor en llinia Eslema.2.

La partida pa la promoción del asturianu asciende a 2.535.701 euros, 330.260 más que nel 2022, lo que supón un aumentu del 14,97 por cientu. “Si consideramos el global d’esta llexislatura, garrando como puntu de partida’l presupuestu del 2019, el 422R –el programa de promoción del asturianu– aumenta un 48,84 por cientu, que ye la xuba porcentual más grande nuna llexislatura en tola serie histórica de Política Llingüística”, lo que, destaca Piñán, “ye una prueba evidente del compromisu d’esti Gobiernu, y en particular de la mio conseyería, cola llingua asturiana”.

“Pal 2023 hai nesti programa una continuidá na llinia presupuestaria abierta en 2022 que tien como exes centrales promover alcuentros en favor de la normalización sectorial como los realizaos nesti 22 na Regalada Fest d’empresa y cultura, y el Xuntoiro pa la zona del Eo-Navia o les actividaes alredor de La Casina de la Traducción a les que queremos dar continuidá”, siguió Piñán, qu’emplegó l’asturianu, como ye vezu, en tola so comparecencia na Comisión de Facienda. Ente les novedaes pal añu qu’entra tán “les dos llinies de subvenciones pa la promoción d’actividaes n’asturianu, una destinada a empreses dotada con 70.000 euros y otra a asociaciones que va tener una dotación de 50.000 euros”.

Avanzada la sesión, y llueu d’una entruga d’Adrián Pumares, diputáu de Foro que tamién usó l’asturianu nel so turnu, sobre l’ausencia d’ayudes a la producción discográfica, el direutor xeneral de Política Llingüística, Antón García, especificó que “nestos momentos tamos trabayando nes bases reguladores neses dos subvenciones qu’aspiren a cubrir al mundu empresarial que quiera facer coses n’asturianu, pero específicamente tamién pa les empreses culturales de la música y d’otros sectores”, amás d’a les asociaciones “pa proyeutos de normalización”.

Refuerzu de les publicaciones en gallego-asturianu

Ente les diferentes aiciones avanzaes por Piñán nesti apartáu de les cuentes apuntó’l so enfotu en que “la Sociedá Pública de Xestión siga implicada na promoción del asturianu y comprometer a otros organismos de l’Alministración pal fomentu del usu de la llingua asturiana”. Tamién citó un aumentu del 33,33 por cientu pa la partida de ‘Edición y difusión de publicaciones’, que queda en 60.000 euros, “cola mira de reforciar les publicaciones propies en xeneral, pero de manera particular les d’eonaviegu, una llingua na que menguó de manera significativa la edición de llibros nestos últimos años”.

La partida de ‘Servicios de calter informáticu’ xube mentes un 62,5 por cientu, hasta los 130.000 euros, “pa reforciar los trabayos empezaos nel 2022 que van dexar poner a disposición de la sociedá asturiana el traductor castellano-asturiano Eslema.2, ameyoráu y actualizáu notablemente que trabaye con facilidá dende los teléfonos móviles, y dar los pasos necesarios pa que la llingua asturiana disponga d’un corrector ortográficu automáticu y eficaz”. Tamién va siguise col trabayu del traductor al gallego-asturiano.

Otros aspeutos rescamplaos pola conseyera foi l’aumentu de la dotación a la Universidá d’Uviéu p’ayudar a la puesta en marcha de la Cátedra María Josefa Canellada dedicada a los estudios asturianistes; la creación de dos servición de normalización llingüística nuevos, el de la Mancomunidá del Valle del Nalón y el de Cabrales –anque se pierden los de Samartín del Rei Aurelio y el de Ribeseya–; la creación del Premiu Pachín de Melás de testos teatrales, “otra reivindicación yá vieya del mundu de les lletres asturianes”; y la medría de l’aportación al proyeutu Falamos d’enseñu non regláu p’adultos d’asturianu y gallego-asturiano.

Na semeya, Piñán esta mañana mientres la so intervención na sala Constitución de la Xunta Xeneral.

Contador Estadistiques