Pumares entruga por ayudes a la grabación de música n'asturianu

La llinia de subvención pa la edición discográfica desapaeció nes cuentes del 2021. PSOE y Izquierda Xunida (IX) fixeron referencia al idioma na so fixación de posición.

"Da la impresión de qu'eses ayudes a la música n'asturianu foron desapaeciendo y nun se sustituyeron por otres como ayuda a la grabación", espresó Adrián Pumares, diputáu de Foro, a Berta Piñán na comparecencia de la conseyera de Cultura, Política Llingüística y Turismu pa presentar el proyeutu de cuentes del so departamente pa los Presupuestos del 2023. La escritora citó l'apoyu a la música tantu n'asturianu como en castellanu dende Cultura al traviés de programes como 'Asturies, Cultura en Rede' y "ún específicu dende Política Llingüística qu'apoya tanto a industries como asociaciones", en referencia a les llinies d'ayudes nueves, de 70.000 y 50.000 euros, de manera respeutiva.

Tamién citó la inversión fecha nel LI Festival Interceltique de Lorient, un apoyu del Gobiernu que Pumares valoró y emponderara yá na Xunta Xeneral, anque fixo tamién referencia a errores sobre'l plantegamientu que se realizó de la presencia asturiana n'An Oriant, pero'l llavianés insistió en centrase "nel apoyu que se da a la producción de música n'asturianu". "Había una serie d'ayudes que foron desapaeciendo", repitió.

Piñán tornó a refirise a les llinies nueves y dio la pallabra al direutor xeneral Antón García, qu'apuntó que dende "Política Llingüística facemos una inversión específica d'apoyu al mundu de la música que yo creo que nesti 2022 se concretó aproximadamente nunos 90.000 o 100.000 euros, dígolo de memoria. Ye verdá que lo que nos que facía falta nel presupuestu de Política Llingüística yeren unes ayudes específiques a lo que vusté se refier, a la posibilidá de que los grupos puedan presentar proyeutos, y ye lo que contemplamos pal 2023 neses dos llinies nueves de subvenciones a empreses pa proyeutos de normalización y p'asociaciones".

“Nestos momentos tamos trabayando nes bases reguladores neses dos subvenciones qu’aspiren a cubrir al mundu empresarial que quiera facer coses n’asturianu, pero específicamente tamién pa les empreses culturales de la música y d’otros sectores”, amás d’a les asociaciones “pa proyeutos de normalización”, finó.

Hasta'l 2020 les actuales ayudes a medios de comunicación y producción editorial pa la normalización n'asturianu convivíen cola de producción discográfica. Esi añu destináronse 20.000 euros nuna partida que desapaeció nes cuentes del 2021.

Reconocimientu d'una realidá social

Ángela Vallina, diputada d'IX, apuntó na so fixación de posición que se "da continuidá a les polítiques de promoción de la llingua que siempre sofitamos y que supón reconocer una realidá social, una realidá cultural y llegal". Pel grupu parllamentariu socialista faló Noelia Macías, que rescampló que "en política llingüística apuestáse de forma clara pola Rede de Normalización Llingüística calteniendo les dotaciones presupuestaries pa los servicios de normalización llingüística, cuantía qu'asciende a más de 300.000 euros. D'igual forma, amplíase la dotación del programa Falamos desendolcáu en collaboración cola Federación Asturiana de Conceyos".