"Consiguimos comunicanos nel idioma que sía", celebró Palacios

Nel 2019 negóse'l derechu d'usar l'asturianu a la conseyera Berta Piñán nesa mesma sala na comisión nel que presentaba'l so programa al frente de Cultura, Política Llingüística y Turismu.

"Nun vamos facer preguntes, pero sí quiero aprovechar pa felicitar a tolos grupos parllamentarios porque nesti cuartu presupuestu nesta llexislatura dalgo avanzamos", rescampló Rafael Palacios, diputáu de Podemos, en referencia a aquella situación vivida'l 1 d'ochobre del 2019. "Tuvimos un problema grave porque nun nos entedíemos polos idiomes que falamos", ironizó, y añadió que "veo que nesti últimu presupuestu consiguimos comunicanos na llingua que sía, y eso ye una bona noticia".

Foi María Gloria García Fernández, presente esta mañana na sala Constitución de la Xunta Xeneral, la qu'interrumpió naquella ocasión a Berta Piñán, que namái pudo falar 25 segundos en llingua asturiana, esixendo la diputada popular traducción simultánea. Ignacio Blanco, de VOX, saltó tamién a protestar, pero esta formación nun acudió güei a la Comisión de Facienda pa sentir y entrugar sobre'l proyeutu de la conseyería nos Presupuestos del 2023, mentes que por Ciudadanos, que se sumó a la quexa de los otros dos partíos con Susana Fernández Álvarez, actual vocera parllamentaria, al frente, güei tuvo representáu por Sergio García Rodríguez.

Nengún se quexó nesta ocasión pol usu del asturianu, idioma qu'emplegaron tanto Palacios como la conseyera, el direutor xeneral de Política Llingüística Antón García, y Adrián Pumares, diputáu de Foro. Luis Armando Fernández Bartolomé, ex diputáu de Ciudadanos agora nel grupu mestu, inclusive fixo dalgún tramu de les sos intervenciones n'amestáu.

Modificación del Reglamentu de la Xunta Xeneral

Lo asocedío va trés años obligó a modificar el Reglamentu de la Cámara, que VOX llevó hasta'l Tribunal Constitucional ensin ésitu, yá qu'esti órganu avaló l'usu del idioma nel Parllamentu asturianu. "Depués de cuatro años nesta Xunta Xeneral ta claro que falando en cualquiera de les llingües propies d'Asturies y en castellanu somos capaces d'entendenos, y eso ye una evolución interesante. Podemos tar n'alcuerdu o en desalcuerdu, pero polo menos podemos falar nes llingües propies del nuesu país con total naturalidá y normalidá", insistió Palacios na fixación de posición.