El presupuestu pa la promoción del asturianu nel 2023 rexistra’l mayor aumentu de la llexislatura, un 14,97 por cientu

La Direición Xeneral de Política Llingüístiva cuenta con un presupuestu nel borrador de les cuentes del Gobiernu pal 2023 de 2.535.701 euros, 330.260 más que nel 2022. Caltiénse la mayor parte de les partíes y la so asignación, cola novedá de dos nueves pa servicios de normalización en Cabrales y la Mancomunidá del Valle del Nalón y otra pa la normalización n’empreses de 70.000 euros.

Esta mañana l’Executivu aprobó’l Proyeutu de Presupuestos Xenerales d'Asturies pal 2023, qu’agora va entamar el trámite parllamentariu na Xunta Xeneral pa la so posible aprobación por parte de los grupos parllamentarios. Les cuentes d’esti añu ascienden a 5.968 millones d’euros, la cifra más alta de la historia del país y un 11,4 por cientu más que nel 2022.

Pa Política Llingüistica destínase un 0,04 por cientu del mesmu, 2.535.701 euros polos 2.205.441 d’esti añu, lo que supón una medría del 14,97 por cientu. Ye l’aumentu mayor de lo que va de llexislatura: 11,8 nel 2020; 9,06 nel 2021; y 6,17 por cientu nel 2022.

D’esos 330.260 euros más colos que va contar la direición xeneral 48.940 van pa cubrir l’aumentu de gastu de personal y 99.380 en gastos en bienes corrientes y servicios. Caltiénense la mayor partida de partíes y les sos cantidaes asignaes, como los 240.000 euros a l’Academia de la Llingua Asturiana, los 110.000 pa les ayudes a medios de comunicación pa la normalización del idioma, los 109.400 pa la espublización de llibros o los criticaos 100.000 euros a RTPA pa la ellaboración de programes n’asturianu.

Entes les principales novedaes, la creación d’una llinia nueva de subvenciones pa la normalización del idioma n’empreses con 70.000 euros y l’aportación de 21.840 euros pa los nuevos servicios de normalización de la Mancomunidá del Valle del Nalón y de 19.400 euros pal de Cabrales, anque desapaecen los de Samartín del Rei Aurelio y Ribeseya. Auméntase la cantidá pal del Cabu Peñes, de 19.400 a 21.840, la mesma que reciben los de de la ‘Comarca de la Sidra’ y el d’A Veiga, mentes que Avilés sigue con 20.400 y los restantes con 19.400 (Mieres, Llangréu, Ḷḷena, Cangas del Narcea, Corvera, Castrillón, Llanera y Grau-Candamu); el de la Universidá d’Uviéu pasa de 14.400 a 19.960.

Los Premios Lliterarios van ver tamién medrar la so partida en 6.000 euros, de 39.000 a 45.000 euros, pa la creación d'un octavu gallardón que se suma a los siete esistentes. Otra manera, la Federación Asturiana de Conceyos, que recibía 86.000 euros, agora va disponer de 131.500 euros pa, ente otres coses, potenciar el programa ‘Falamos’ d’enseñu non regláu a adultos, y incorpórase una partida nueva de 50.000 euros baxo’l títulu ‘Normalización del asturiano’.

1,9 millones nel 2020

Los Presupuestos del 2020, los primeros del Gobiernu actual d’Adrián Barbón, destinaron 1.904.630 euros a la promoción del asturianu. La cantidá afitada nel proyeutu actual pal 2023 son 631.071 más, lo que supón un incrementu del 33,13 por cientu del entamu al final de la llexislatura.

Na semeya, la conseyera de Facienda, Ana Cárcaba; la direutora xeneral de Presupuestos, Eva Díaz Álvarez; y la de Finances y Economía, Mar García Salgado, esta mañana dando a conocer los datos del proyeutu de cuentes pal 2023.