Un cómic del autor piloñés Enrique Carballeira resultó ganador del VI Premiu Alfonso Iglesias, gallardón incluyíu nos Premios Lliterarios 2014 qu’entrega la Conseyería d’Educación, Cultura y Deporte. La obra ‘L’arume de la tierra’ convenció al xuráu por unanimidá.

Raquel Alonso Álvarez protagonizó la charra mensual d’Ástura cola intervención ‘Ruinas, reliquias y cruces: la construcción histórica de los símbolos de Asturias’. “Nel sieglu XII hebo una sofisticadísima reconstrucción memorial de los símbolos d’Asturies”, apuntó la esperta medievalista. Éstos caltiénense anguaño ente la población.

El Conseyu de Gobiernu aprobó un presupuestu pal 2015 de 3.959 millones d’euros, un 1,2 por cientu más qu’esti añu, cuando l'Executivu de Javier Fernández tuvo que prorrogar l’anterior al nun llegar a alcuerdos col restu de grupos. Nesta ocasión, les cuentes de la FSA-PSOE tienen l’apoyu del Partido Popular (PP) tres aceptar una rebaxa fiscal.

Nueve díes depués de l’apaición en prensa d'una información sobre la participación d’Esther Díaz en Davelco, empresa alministrada pol so maríu y subcontratada por axudicataries d’obres públiques, la conseyera de Bienestar Social y Vivienda dimite. Anuciólo na mañana del llunes nuna intervención énte la Comisión de Presidencia de la Xunta Xeneral.

‘Caleya Sésamu: el papel de la televisión na tresmisión interxeneracional de la llingua’ resultó l’ensayu ganador del XX Premiu Máximo Fuertes Acevedo. El periodista Damián Barreiro ye l’autor d’esta obra merecedora del gallardón qu’entrega la Conseyería d’Educación, Cultura y Deporte.

La formación folk Cerezal va asoleyar esti mes el so segundu trabayu d’estudiu, ‘Camín’. Tres l’EP espublizáu l’añu pasáu, los mierenses dan un pasu más na so trayeutoria con esti llarga duración que van presentar el domingu 23 de payares con un conciertu en Mieres.

La Conseyería d’Educación, Cultural y Deporte falló’l primer de los cinco premios lliterarios del 2014. Foi’l María Xosefa Canellada de lliteratura infantil y xuvenil, que recayó nel trabayu ‘Cápsules de tiempu’, obra del escritor piloñés Carlos González Espina.  

Un terciu de la población catalana con derechu a votu participó’l domingu na consulta soberanista entamada pol Govern de Catalunya. El 80 por cientu de los votantes escoyó la opción ‘Sí-Sí’, esto ye, la independencia del país mediterraneu, lo que supón más de 1.800.000 persones.

El PP ganaría les eleiciones xenerales con un 27,5 por cientu de los votos, por un 23,9 por cientu que recibiría’l PSOE y un 22,5 qu’algamaría Podemos, según datos del CIS. La formación liderada por Pablo Iglesias ye la primera n’intención direuta de votu, con un 17,6 por cientu por un 14,3 del PSOE.